प्रहरीको भनाइ– ‘अनैतिक गतिविधि उन्मूलन गरिन्छ’
महेश सिंह लहान –सिरहाको लहान नगरपालिका–३ स्थित अस्पताल चौक वरपरका केही होटेल र लजमा यौन धन्दा फस्टाएको भन्दै स्थानीय बासिन्दाहरूले कडा आपत्ति जनाएका छन्।
विशेष गरी ‘अधिकार होटल एण्ड लज’, ‘सुभ लक्ष्मी एभरेष्ट लज’, ‘सगरमाथा लज’ लगायतका केही लजहरूमा अनैतिक गतिविधिहरू भइरहेको आरोप स्थानीयले लगाएका हुन्।
इलाका प्रहरी कार्यालय लहानका इन्चार्ज प्रहरी नायव निरीक्षक (सई) कैलास रायले स्थानीयको गुनासोलाई गम्भीरतापूर्वक लिएको बताउँदै, “हामीले आवश्यक अनुसन्धान अघि बढाएका छौं। यस्ता अनैतिक क्रियाकलापमा संलग्न व्यक्तिहरूलाई कानुनी दायरामा ल्याइनेछ,” उनले स्पष्ट पारे।
स्थानीयका अनुसार यौन धन्दाबाट होटेल सञ्चालकहरू मासिक लाखौं रुपैयाँ आम्दानी गर्दै आएका छन्। सामाजिक विकृति र अपराधका घटनामा वृद्धि हुँदै गएकाले तत्काल कडा निगरानी र प्रहरीले नियमित रुपमा खानतलासी गर्नुपर्ने माग समेत उठेको छ।
यसबारे लहान–३ का एक स्थानीय समाजसेवीले भने, “सरोकारवाला निकाय मौन बसिरहँदा हाम्रो समाजमा विकृति मौलाउँदैछ। प्रहरी र प्रशासन सक्रिय नभएसम्म यो जस्ता आपराधिक धन्दामा अंकुश लाग्दैन।”
सामाजिक मर्यादा र कानूनको उल्लंघन गर्ने यस्ता क्रियाकलापमा संलग्नहरूमाथि कडा कानुनी कारबाहीको माग गर्दै स्थानीय बासिन्दाहरूले प्रशासनसँग कडा कदम चाल्न आग्रह गरेका छन्।
Discussion about this post