गरिब र सीमान्तकृत गर्भवती महिलालाई पोषण सामग्री वितरण

महेश सिंह लहान- समाजसेवी महेश प्रसाद चौधरीले गरिब, दलित र सीमान्तकृत समुदायका गर्भवती महिलालाई लक्षित गरी मंगलबार पोषण सामग्री वितरण गरेका छन्।

लहान नगरपालिका–२० मा आयोजित कार्यक्रममा ५२ जना गर्भवती महिलालाई पोषणयुक्त खाध्य सामग्री वितरण गरिएको वडा अध्यक्ष गणेश प्रसाद चौधरीले जानकारी दिए। उनका अनुसार चौधरीले महिनैपिच्छे २२ गते यस्ता कार्यक्रम गर्दै आएका छन्।

“गर्भावस्थामै महिलालाई पोषण पुगेमा शिशु कुपोषणमा पर्नेदेखि बच्न सकिन्छ,” वडा अध्यक्ष चौधरीले भने, “महेशजीको पहल सराहनीय छ।”

पोषण सामग्री पाएका अधिकांश महिलाले सहयोगप्रति खुसी व्यक्त गरेका थिए। उनीहरूले स्वास्थ्योपचार र सन्तुलित आहारको अभावमा सधैं अप्ठ्यारोमा पर्नुपर्ने अवस्था रहेकाले यस्तो कार्यक्रम उपयोगी भएको बताए।

चौधरीले पछिल्लो केही वर्षदेखि स्वास्थ्य र पोषणलाई प्राथमिकता दिँदै गरिब समुदायमा नियमित रुपमा खाद्यान्न र जनचेतनामूलक कार्यक्रम गर्दै आएका छन्।