महेश सिंह सिरहा- सिरहाको लक्ष्मीपुरपतारी गाउँपालिका–४ धनछ्वार्मा आइतबार राति अज्ञात समूहद्वारा गरिएको आगजनीमा करिब १४ लाख रुपैयाँ बराबरको क्षति भएको छ। स्थानीय बिन्देश्वरी यादवको घरमा राति करिब १ बजेतिर आगलागी भएको इलाका प्रहरी कार्यालय महेशपुर पतारीले जनाएको छ।
पीडित परिवारका अनुसार मुसलधारे वर्षासँगै विद्युत लाइन समेत काटिएको समयमा अज्ञात समूहले पेट्रोल छर्केर आगो लगाएको हो। आगलागीबाट यादवको घरमा सञ्चालित किराना जेनरल स्टोर, बस्तुभाउको गोठ र गोदाम पूर्णरूपमा जलेर नष्ट भएका छन्। घटनामा कस्मेटिक सामग्री, किराना सामान, लत्ताकपडा, नगद र स.११प.११० नम्बरको मोटरसाइकल समेत जलेको पीडितका छोरा रामकिशोर यादवले बताए।
“बाख्रासहित चार थान जनावर जलेर मरे, सबै सम्पत्ति खरानी भयो,” यादवले भने, “अझसम्म न स्थानीय सरकार न त कुनै दातृ निकायले राहतका लागि सम्पर्क गरेका छन्।”
इलाका प्रहरी कार्यालय महेशपुर पतारीका अनुसार आगलागीको खबर पाउने बित्तिकै प्रहरी टोली घटनास्थल पुगेको थियो। तर, भारी वर्षाका कारण आगो नियन्त्रणमा लिन तीन घन्टा लागेको थियो।
अहिलेसम्म आगो कसले लगाएको भन्ने विषयमा अनुसन्धान भइरहेको प्रहरीले जनाएको छ। आगलागीपछि पीडित परिवार गहिरो मानसिक तनावमा रहेको छ। स्थानीयवासीले पीडितलाई तत्काल राहत तथा क्षतिपूर्ति उपलब्ध गराउन सम्बन्धित निकायसँग माग गरेका छन्।
Discussion about this post