लहानमा ट्राफिक प्रहरीको सडक सचेतना अभियान

महेश सिंह सिरहा- पूर्व–पश्चिम राजमार्गअन्तर्गत लहान खण्डमा सडक दुर्घटनाको जोखिम बढेपछि ट्राफिक प्रहरीले सडक सुरक्षा सचेतना अभियान सुरु गरेको छ।
चाइना रेलवे कम्पनीले निर्माण गरिरहेको लहानको सडक खण्ड अस्थायी र अस्थिर बनेपछि सर्वसाधारण र पैदलयात्रुहरू उच्च जोखिममा परेका छन्। सडक पेटीमा व्यापार गर्ने व्यापारीहरू, अनियन्त्रित सवारी चाप र निर्माणाधीन सडकको अव्यवस्थित अवस्था दुर्घटनाको मुख्य कारण बनेका छन्।
सडकमा पैदल हिँड्ने नागरिक दुर्घटनामा पर्ने सम्भावना बढेपछि जिल्ला ट्राफिक प्रहरी कार्यालय सिरहाले विशेष अभियान सञ्चालनमा ल्याएको हो।
ट्राफिक प्रहरी लहानका इन्चार्ज प्रहरी निरीक्षक पोषणराज थपलियाका अनुसार, सडक सुरक्षालाई प्राथमिकतामा राख्दै लहानमा दर्जनौं ट्राफिक प्रहरी परिचालन गरिएको छ। “सडकमा पैदल हिँड्ने, व्यापार गर्ने र सवारी साधन चलाउने सबै पक्षलाई सचेत गराउन अभियान सञ्चालन गरिएको हो,” उनले भने।
अभियानअन्तर्गत ट्राफिक प्रहरीले सडक किनारमा व्यापार गरिरहेका व्यापारीलाई हटाउने, सचेतना दिने र ट्राफिक नियमको पालना गराउन कडाइ थालेको छ।
स्थानीय बासिन्दाले ट्राफिकको सक्रियता र सचेतना अभियानलाई सकारात्मक रूपमा लिएका छन्। तर निर्माण कम्पनीले सडक गुणस्तरीय नबनाउँदा समस्या थपिएको उनीहरूको गुनासो छ।