मिटर ब्याज तथा ठगीविरुद्ध संघर्ष समिति सशक्त आन्दोलनको तयारीमा

महेश सिंह लहान- मिटर ब्याज तथा ठगीविरुद्ध किसान मजदूर संघर्ष समिति सशक्त आन्दोलनको तयारीमा लागेको छ। मंगलबार सम्पन्न महत्वपूर्ण बैठकले आन्दोलनलाई थप संगठित गर्दै संघर्षलाई केन्द्रीकृत गर्ने रणनीति तय गरेको छ।
सप्तरीको राजविराजमा सम्पन्न बैठकमा संघर्ष समितिका जिल्ला अध्यक्ष तैजब अली को अध्यक्षतामा छलफल भएको थियो। कार्यक्रममा समितिका केन्द्रीय अध्यक्ष अवधेश कुशवाहा, संघर्षशील नेता विजय सिंह, श्रवण चौधरी लगायत दुई दर्जनभन्दा बढी अगुवाहरूको उपस्थिति रहेको थियो। बैठकमा उपस्थित नेताहरूले मिटर ब्याज तथा ठगीको मारमा परेका किसान-मजदूरहरूको न्यायका लागि अझै कठोर आन्दोलन आवश्यक रहेको धारणा राखेका थिए।
बैठकले आन्दोलनको प्रभावकारिता बढाउनका लागि स्थानीय स्तरदेखि केन्द्रसम्म संगठन विस्तार गर्ने महत्वपूर्ण निर्णय गरेको छ। नगरपालिका, गाउँपालिका र वडा तहसम्म संघर्ष समिति गठन गरी अभियानलाई बलियो बनाइने छ। केन्द्रीय समितिले संगठन विस्तारका लागि विशेष निर्देशनसमेत जारी गरेको छ।

संघर्ष समितिले ४४ दिने जनजागरण अभियान सुरु गरिसकेको छ। यस अभियानमार्फत किसान-मजदूर तथा पीडित वर्गलाई संगठित गरी उनीहरूको अधिकार र न्यायका लागि दबाब सिर्जना गरिने छ। अभियान अन्तर्गत विभिन्न जिल्लाहरूमा सभा, गोष्ठी र जनपरिचालन कार्यक्रमहरू सञ्चालन गरिने संघर्ष समितिले जनाएको छ।
बैठकमा सहभागी नेताहरूले राज्य पक्षबाट पीडितहरूको आवाजलाई बेवास्ता गरिएको भन्दै अब आन्दोलनलाई थप सशक्त बनाउने निर्णय गरेका छन्। बैठकले आउँदा दिनमा मालपोत कार्यालय, जिल्ला प्रशासन कार्यालय लगायतका सरकारी निकायहरू घेराउ गर्ने निर्णय गरेको छ।
संघर्ष समितिका नेताहरूले न्याय नपाएसम्म आन्दोलन जारी राख्ने चेतावनी दिएका छन्। उनीहरूले सरकारले कुनै ठोस कदम नचाले काठमाडौं केन्द्रित आन्दोलन गर्ने घोषणा गरेका छन्। यसअघि पनि संघर्ष समितिले विभिन्न चरणमा आन्दोलन गर्दै आएको थियो। तर, राज्यका सम्बन्धित निकायहरूले समस्या समाधान गर्न चासो नदेखाएको भन्दै नेताहरू आक्रोशित भएका छन्।
अबको रणनीतिअनुसार, संघर्ष समिति देशभर संघर्षका कार्यक्रमहरू सञ्चालन गर्दै काठमाडौंमा केन्द्रित प्रदर्शन गर्ने तयारी गरिरहेको छ। उनीहरूले किसान-मजदूर तथा अन्य पीडितहरूसँग ऐक्यबद्धता जनाउँदै न्यायका लागि अन्तिमसम्म लड्ने प्रतिबद्धता व्यक्त गरेका छन्।