महेश सिंह लहान, वडा नं. २४ – लहान नगरपालिका वडा नम्बर २४ निवासी राम नारायण चौधरीले आफ्नै बुहारी बेबी चौधरीमाथि पटक–पटक मानसिक यातना तथा निर्घात कुटपिट गर्दै आएको खुलासा भएको छ। घरेलु हिंसाका घटनामा संलग्न हुँदै आएका चौधरीले बिहीबार राति पुनः कुटपिट गरेपछि पीडित महिलाको अवस्था गम्भीर बनेको छ।
घरेलु हिंसाबाट गम्भीर घाइते भएकी बेबी चौधरीलाई तत्काल लहानस्थित प्रादेशिक अस्पतालमा भर्ना गरी उपचार भइरहेको छ। स्थानीयका अनुसार, आरोपित राम नारायण चौधरीले विगत लामो समयदेखि बुहारीलाई मानसिक र शारीरिक रूपमा यातना दिँदै आएका थिए। घटनापछि स्थानीय बासिन्दाले आक्रोश व्यक्त गर्दै चौधरीलाई समाजका लागि नै घातक व्यक्ति भएको आरोप लगाएका छन्।
पीडित महिलाका श्रीमान् विजय चौधरी विगत दुई वर्षदेखि वैदेशिक रोजगारीका लागि मलेसियामा छन्। श्रीमान् विदेशमा भएको अवस्थामा ससुराबाट पटक–पटक हिंसा सहन बाध्य भएको पीडित पक्षको भनाइ छ।
घटनाको जानकारी पाएलगत्तै प्रहरीले राम नारायण चौधरीलाई नियन्त्रणमा लिएको छ। लहान प्रहरी कार्यालयका अनुसार, घटनाको विस्तृत अनुसन्धान भइरहेको छ भने कानुनी प्रक्रियाअनुसार कारबाही अघि बढाइनेछ।
स्थानीयवासीले दोषीलाई कडाभन्दा कडा कारबाही गर्न माग गरेका छन्। घरेलु हिंसाका घटनाहरू रोक्न सम्बन्धित निकायले प्रभावकारी कदम चाल्नुपर्ने उनीहरूको भनाइ छ।
Discussion about this post