लहानमा विपन्नलाई कम्बल वितरण

महेश सिंह सिरहा –लहान नगरपालिकाले चिसोबाट प्रभावित गरिब र विपन्नलाई राहतस्वरूप कम्बल वितरण गरेको छ। मेयर महेश प्रसाद चौधरी र महिला अधिकारकर्मी रीता महतोको पहलमा वडा नम्बर १० र १४ का २२ जना महिलालाई कम्बल वितरण गरिएको हो।

लहान नगरपालिकाले पछिल्लो एक महिनायता गरिब पहिचान गरी विभिन्न राहत कार्यक्रम सञ्चालन गरिरहेको छ। बुधबार वडा नम्बर १० र १४ का बरछवा टोलमा पुगेर मेयर चौधरीले दलित, एकल महिला र वृद्धहरूसँग भेटघाट गरेका थिए। सो अवसरमा उनले स्थानीयको समस्या सुनेर २२ जनालाई कम्बल वितरण गरे।
“गरिब वर्गका लागि यस्ता कार्यक्रमलाई निरन्तरता दिनेछौं,” मेयर चौधरीले भने। महिला अधिकारकर्मी रीता महतोको विशेष पहलमा दलित बस्तीमा यो कार्यक्रम गरिएको हो।
महतोले यस्ता कार्यक्रमले चिसोको समयमा गरिब वर्गलाई ठूली राहत पुग्ने भन्दै अन्य स्थानीय तहले पनि प्रभावकारी कदम चाल्नुपर्ने आवश्यकता औंल्याइन्।
लहान नगरपालिकाले गरिब वर्गका लागि राहत र सहायताका कार्यक्रमलाई प्राथमिकता दिए पनि अन्य स्थानीय तहले भने यसतर्फ कम ध्यान दिएको स्थानीयको गुनासो छ।