सिरहाको नरहा गाउँपालिकामा राजनीतिक दलहरूको संयुक्त पिकनिक भव्य रूपमा सम्पन्न

महेश सिंह लहान –सिरहा जिल्लाको नरहा गाउँपालिकामा नेपाली कांग्रेस, नेकपा एमाले, माओवादी केन्द्र र जनता समाजवादी पार्टी (जसपा) नेपालको संयुक्त आयोजनामा भव्य पिकनिक सम्पन्न भएको छ। कार्यक्रम गाउँपालिकाको वडा नम्बर ४ मा पर्ने लौवीनियाँदह धार्मिक स्थलमा आयोजना गरिएको थियो।
उक्त पिकनिकमा जसपाका विजय कुमार यादव, रामसोगार्थ यादव, रंजित यादव, बद्री नारायण यादव, पूर्व गाउँपालिका अध्यक्ष रामशरण यादव, माओवादी केन्द्रका बिष्णुदेव यादव, कांग्रेसका विभिन्न नेताहरू लगायतको उल्लेखनीय उपस्थिति थियो।

कार्यक्रमका सहभागीहरूले एक आपसमा सद्भाव र भाइचाराको सम्बन्ध सुदृढ बनाउने उद्देश्यले शुभकामना आदानप्रदान गरेका थिए। सहभागी नेताहरूले सामाजिक सद्भाव, शान्ति र अमनचयन कायम गर्न यस्तो प्रकारका कार्यक्रमहरू महत्वपुर्ण रहेको बताएका छन्।
आयोजक समितिका अनुसार कार्यक्रम अत्यन्त भव्य र उत्साहजनक रूपमा सम्पन्न भएको छ। यो पिकनिकले समुदायका बीचमा एकता, मित्रता र सहकार्यको सन्देश प्रवाह गर्ने विश्वास गरिएको छ।

धार्मिक स्थल लौवीनियाँदहमा भएको यस पिकनिकले राजनीतिक दलहरूबीच मैत्रीपूर्ण सम्बन्धलाई थप सुदृढ बनाउने मात्र नभई स्थानीय समुदायलाई समेत सकारात्मक सन्देश दिएको छ।