लायन्स क्लब अफ फूलवारीद्वारा दिपमालाको अवसरमा वृक्षारोपण र शैक्षिक सामग्री वितरण
महेश सिंह लहान, पुस २२ – सामाजिक उत्तरदायित्व अन्तर्गत लायन्स क्लब अफ फूलवारीले लहान नगरपालिका-२३, गढास्थित श्री सरस्वती आधारभूत विद्यालयमा वृक्षारोपण तथा शैक्षिक सामग्री वितरण कार्यक्रम सम्पन्न गरेको छ। क्लबका चार्टर प्रेसिडेन्ट राकेश कुमार झाका अनुसार यो कार्यक्रम दिपमाला र चन्दन गुप्ताका पुत्र नयनराज गुप्ताको जन्मोत्सवको अवसरमा आयोजना गरिएको हो।
कार्यक्रमको प्रारम्भ बिहान ९ बजे वृक्षारोपण अभियानबाट गरिएको थियो। विद्यालय परिसरमा विभिन्न प्रजातिका वृक्षारोपण गरी वातावरण संरक्षणप्रति सचेतना अभिवृद्धि गरियो। त्यसपछि विद्यालयका सबै विद्यार्थीहरूलाई शैक्षिक सामग्रीको रूपमा झोला वितरण गरियो। क्लबका अध्यक्ष शङ्कर प्रसाद गुप्ताका अनुसार झोला वितरणले विद्यार्थीहरूलाई अध्ययनमा थप प्रोत्साहित गर्ने उद्देश्य राखिएको हो।
कार्यक्रममा लायन्स क्लब अफ फूलवारीका पदाधिकारी सदस्यहरू, चार्टर प्रेसिडेन्ट राकेश कुमार झा, पूर्व वडाध्यक्ष कन्हैया प्रसाद गुप्ता, वर्तमान वडाध्यक्ष बद्री नारायण यादव, विद्यालयका प्रधानाध्यापक महेन्द्र प्रसाद यादव, अभिभावकहरू, र स्थानीय बासिन्दाहरूको उल्लेखनीय उपस्थिति थियो।
वर्तमान वडाध्यक्ष बद्री नारायण यादवले पूर्व वडाध्यक्ष कन्हैया प्रसाद गुप्ताको योगदानको प्रशंसा गर्दै नयनराज गुप्ताको जन्मदिनलाई सामाजिक र शैक्षिक कार्यमार्फत मनाउनुभएको प्रयासलाई उदाहरणीय भने। विद्यालयका प्रधानाध्यापक महेन्द्र प्रसाद यादवले क्लबद्वारा गरिएका यी कार्यहरूले विद्यालयको शैक्षिक वातावरणलाई थप सुदृढ बनाउने विश्वास व्यक्त गरे।
चार्टर प्रेसिडेन्ट राकेश कुमार झाले क्लबले स्वास्थ्य, सरसफाइ, शिक्षा, र वातावरणीय सुधार जस्ता क्षेत्रमा गर्दै आएको कामको चर्चा गर्दै यस प्रकारका कार्यक्रमहरूले समाजमा सकारात्मक प्रभाव पार्ने बताए। “लायन्स क्लब अफ फूलवारीले सामाजिक र मानवीय हितका क्षेत्रमा गरेको योगदानले गौरव महसुस गर्न सकिने आधार तयार गरेको छ,” उनले भने।
कार्यक्रमले विद्यालयमा शैक्षिक सहायताको पहुँच पुर्याउनका साथै वातावरणीय संरक्षणको महत्त्वलाई पनि प्रवर्द्धन गरेको छ। शैक्षिक सामग्री पाएपछि विद्यार्थीहरूमा उत्साह देखिएको थियो। अभिभावकहरूले पनि क्लबद्वारा गरिएको प्रयासप्रति आभार प्रकट गर्दै यस्ता गतिविधिहरूले समाज सुधारमा सहयोग पुर्याउने धारणा राखे।लायन्स क्लब अफ फूलवारीले यसअघि पनि शिक्षा, स्वास्थ्य, र सरसफाइमा योगदान गर्दै आएको छ। सामाजिक सेवाका यस्ता कार्यले क्लबलाई एक आदर्श संस्थाको रूपमा स्थापित गर्न सहयोग पुगेको छ। भविष्यमा पनि यस्ता कार्यक्रमलाई निरन्तरता दिने क्लबका अध्यक्ष शङ्कर प्रसाद गुप्ताले प्रतिबद्धता व्यक्त गरे।
Discussion about this post