नरहा गाउँपालिकामा कृषि तथा पोषण मेला भव्य रूपमा सम्पन्न, उत्कृष्ट १० कृषक समूह सम्मानित

महेश सिंह लहान सिरहा – राष्ट्रिय कृषक समूह महासंघ नेपालद्वारा सञ्चालित पोषण परियोजनाअन्तर्गत नरहा गाउँपालिकामा कृषि तथा पोषण मेला भव्य रूपमा सम्पन्न भएको छ। मेलामा कृषकहरूको उत्पादन, आधुनिक कृषि प्रविधि, स्वास्थ्य तथा पोषणसम्बन्धी जानकारी एकै स्थानमा उपलब्ध गराउँदै कृषि विकास र पोषण सुधारका विषयमा व्यापक जनचेतना फैलाइएको थियो।

मेलाको मुख्य उद्देश्य स्थानीय कृषकहरूले उत्पादन गरेका अन्नबाली, दलहन, तेलहन, हरियो सागसब्जी तथा पशुपन्छीजन्य उत्पादनको प्रदर्शन र बजारीकरण गर्नुका साथै कृषकलाई आधुनिक कृषि प्रविधि, उन्नत बीउबिजन, जैविक किरा नियन्त्रण विधि तथा वैज्ञानिक खेती प्रणालीबारे जानकारी गराउनु रहेको आयोजकले जनाएको छ। 

राष्ट्रिय कृषक समूह महासंघमा आबद्ध २७ वटा कृषक समूहका सदस्यहरूले आफ्नै खेतबारीमा उत्पादन गरेका विभिन्न कृषि उपज तथा पशुपन्छीजन्य सामग्री प्रदर्शन गरेका थिए। प्रदर्शनीमा अन्नबाली, दलहन, तेलहन, हरियो तरकारी, फलफूल तथा अन्य स्थानीय उत्पादनले दर्शकको ध्यान आकर्षित गरेको थियो।

मेलामा विभिन्न एग्रोभेटहरूले कृषकमैत्री कृषि औजार, प्राङ्गारिक मल, किरा नियन्त्रणका ट्रयाप तथा तरकारी, फूल र अन्य बालीका बीउबिजन प्रदर्शन गरेका थिए। कृषि शाखाले माटो परीक्षण गर्ने उपकरण प्रदर्शन गरी माटोको गुणस्तर परीक्षणबारे जानकारी दिएको थियो भने पशु सेवा शाखाले गोबर परीक्षण उपकरण प्रदर्शन गर्दै पशुपालनसम्बन्धी परामर्श सेवा प्रदान गरेको थियो।

त्यसैगरी स्वास्थ्य शाखाले हाइट बोर्ड, मुआक (MUAC) नाप्ने टेप, विभिन्न औषधि तथा परिवार नियोजनका साधन प्रदर्शन गरी स्वास्थ्य र पोषणसम्बन्धी जनचेतना फैलाएको थियो। महिला स्वास्थ्य स्वयंसेविकाहरूले पोषण नाग (Nutrition Snake) प्रदर्शनमार्फत सन्तुलित आहार र पोषणको महत्वबारे जानकारी गराएका थिए। सरस्वती डेरीले दूधबाट तयार गरिएका विभिन्न परिकार प्रदर्शन गर्दै कृषि उत्पादनको मूल्य अभिवृद्धिको सम्भावनाबारे उदाहरण प्रस्तुत गरेको थियो।

मेलाको अवसरमा उत्कृष्ट कार्यसम्पादन गरेका १० वटा कृषक समूहलाई सम्मानपत्र तथा मायाको चिनो प्रदान गरिएको थियो। सम्मानित समूहहरूलाई कृषि उत्पादन वृद्धि, समूहगत सक्रियता तथा समुदायमा पुर्‍याएको योगदानका आधारमा छनोट गरिएको आयोजकले जनाएको छ।

राष्ट्रिय कृषक समूह महासंघ नेपालका प्रतिनिधि संजय कुमार पण्डित र डिनीता साहले किसानको जीवनस्तर उकास्न जनचेतनामूलक कार्यक्रम, सीप विकास तथा क्षमता अभिवृद्धि तालिम सञ्चालन गर्दै आत्मनिर्भर कृषक तयार पार्ने उद्देश्यका साथ महासंघले काम गरिरहेको बताए।

कार्यक्रममा बोल्दै नरहा गाउँपालिका अध्यक्ष रामप्रमोद यादवले महासंघले सञ्चालन गरेका कार्यक्रमहरू किसानका लागि उपयोगी र प्रभावकारी रहेको उल्लेख गर्दै यस्ता पहलले किसानको जीवनशैलीमा सकारात्मक परिवर्तन ल्याएको बताए। उनले विगतको तुलनामा अहिले किसानको दैनिकी र कृषि प्रतिको सोचमा उल्लेखनीय सुधार आएको धारणा व्यक्त गरे।

मेलामा सहभागी किसानहरूले आफ्नै खेतबारीमा उत्पादन गरेका ताजा तरकारी तथा कृषि उपज प्रदर्शनमा राखेका थिए। कृषि, स्वास्थ्य र पोषणलाई एकै मञ्चमा जोड्दै आयोजित उक्त मेला किसानको उत्पादन प्रवर्द्धन, ज्ञान आदानप्रदान तथा समुदायमा पोषण सचेतना विस्तार गर्ने महत्वपूर्ण अवसर बनेको सहभागीहरूले बताएका छन्।