बालअधिकार, शिक्षा र सुरक्षालाई प्राथमिकता दिँदै सुरुङ्गा–२ बालमैत्री वडा घोषणा

महेश सिंह लहान सिरहा – बालबालिका लिकाको अधिकार, सुरक्षा, सहभागिता तथा विकासलाई प्राथमिकतामा राख्दै सुरुङ्गा नगरपालिका वडा नं. २ लाई बालमैत्री स्थानीय शासन वडा घोषणा गरिएको छ। बिहीबार आयोजित विशेष समारोहबीच विभिन्न सूचक पूरा गरेपछि वडालाई बालमैत्री वडा घोषणा गरिएको हो।

बालमैत्री स्थानीय शासन वडा घोषणा सभामा बालबालिकाहरूले नाटक, गीत, नृत्य तथा जनचेतनामूलक सांस्कृतिक प्रस्तुति मार्फत बालअधिकार, शिक्षा, स्वास्थ्य तथा सामाजिक उत्तरदायित्वका विषय उठाएका थिए। कार्यक्रममा बालबालिकाको सक्रिय सहभागिताले उपस्थित सरोकारवालाको ध्यान आकर्षित गरेको थियो।

वडा स्तरमा बालमैत्री स्थानीय शासनका आवश्यक सूचकहरू पूरा गर्न शिक्षा, स्वास्थ्य, सरसफाइ, बाल संरक्षण, जन्मदर्ता, बाल सहभागिता तथा बालमैत्री वातावरण निर्माणका क्षेत्रमा विभिन्न गतिविधि सञ्चालन गरिएको जनाइएको छ।

कार्यक्रममा बोल्दै वक्ताहरूले बालबालिकाको हितलाई केन्द्रमा राखेर विकास निर्माणका योजना अघि बढाउनुपर्नेमा जोड दिएका थिए। उनीहरूले बालमैत्री घोषणा केवल औपचारिकता नभई बालअधिकार सुनिश्चित गर्ने दायित्वको सुरुआत भएको बताए।

समारोहमा जनप्रतिनिधि, स्थानीय बासिन्दा, शिक्षक, विद्यार्थी, बाल क्लबका प्रतिनिधि तथा विभिन्न संघसंस्थाका पदाधिकारीहरूको उल्लेख्य सहभागिता रहेको थियो।

सबल नेपाल र सेभ द चिल्ड्रेनको समन्वय तथा सहयोगमा सम्पन्न कार्यक्रमले बालमैत्री समाज निर्माणका लागि स्थानीय तह, समुदाय र बालबालिकाबीचको सहकार्यलाई थप मजबुत बनाएको सहभागीहरूले बताएका छन्।

बालबालिकाको आवाजलाई स्थानीय शासन प्रणालीसँग जोड्दै सुरुङ्गा–२ लाई बालमैत्री वडा घोषणा गरिनु स्थानीय स्तरमा बालअधिकार प्रवर्द्धनका लागि महत्वपूर्ण उपलब्धिका रूपमा हेरिएको छ।