घरमै उत्पादनबाट कुपोषण न्यूनीकरणतर्फ पहल

महेश सिंह लहान सिरहा, सप्तकोशी -कुपोषण न्यूनीकरणका लागि घरपरिवारमै उत्पादन बढाउने लक्ष्यसहित सप्तकोशी नगरपालिकामा पोषणसम्बन्धी लक्षित कार्यक्रम सञ्चालन गरिएको छ। राष्ट्रिय कृषक समूह महासंघ र केयर नेपाल संस्थाको साझेदारीमा सञ्चालित कार्यक्रमअन्तर्गत हालै गम्भीर कुपोषण देखिएका परिवारलाई केन्द्रित गरी अभिमुखीकरण तथा सहयोग वितरण गरिएको हो।
पोषण अवस्थाको मूल्यांकनपछि पहिचान गरिएका परिवारलाई सानो जमिनमै तरकारी तथा फलफूल उत्पादन गर्न सकिने “पोषण बगैंचा” स्थापना सम्बन्धी तालिम दिइएको थियो। सहभागीलाई बाली छनोट, मल व्यवस्थापन र बगैंचाको हेरचाहबारे व्यावहारिक जानकारी प्रदान गरिएको आयोजकले जनाएको छ।
कार्यक्रमअन्तर्गत कुपोषित बालबालिका भएका परिवारलाई तत्कालीन राहतस्वरूप प्रति परिवार तीन हजार रुपैयाँ बराबरको खाद्य सामग्री वितरण गरिएको छ। यसले अल्पकालीन आवश्यकतासँगै दीर्घकालीन उत्पादनतर्फ उन्मुख गराउने अपेक्षा गरिएको छ।
अनुगमनका क्रममा राष्ट्रिय कृषक समूह महासंघका मधेस प्रदेश सचिव यामुन प्रसाद यादवले कार्यक्रमलाई किसानमुखी बनाउँदै प्रत्यक्ष लाभ सुनिश्चित गर्नुपर्नेमा जोड दिए। उनले यस्ता कार्यक्रमले ग्रामीण जीवनस्तर सुधारमा सहयोग पुग्ने बताए।
यसैबीच, कार्यक्रमको प्रभावकारिता र आगामी कार्ययोजनाबारे छलफल गर्न नगरपालिकामा खाद्य सुरक्षा समितिसँग समिक्षा बैठकसमेत गरिएको छ। बैठकमा वडाध्यक्ष, शाखा प्रमुख तथा सरोकारवालाहरूको सहभागिता रहेको थियो।
कार्यक्रमको सहजीकरण परियोजना संयोजक सावन कुमार यादवले गरेका थिए। स्थानीय तह, कृषक समूह र साझेदार संस्थाबीचको सहकार्यले समुदायस्तरमै पोषण सुधारको प्रयासलाई संस्थागत बनाउने अपेक्षा गरिएको छ।