लहानमा स्वास्थ्यकर्मीको क्षमता अभिवृद्धि कुपोषित बालबालिकाको पहिचान र उपचारमा जोड

महेश सिंह सिरहा,लहान –दलित विकास मञ्चको आयोजना, हेलेन केलर इन्टरनेशनलको आर्थिक सहयोग तथा लहान नगरपालिकाको समन्वयमा लहान नगरपालिका–४ मा नगरस्तरीय ३ दिने “शीघ्र कुपोषणको एकीकृत व्यवस्थापन (परिमार्जित २०८१)” सम्बन्धी तालिम सञ्चालन गरिएको छ।
कार्यक्रमको उद्देश्य कुपोषण भएका बालबालिकालाई समयमै पहिचान गरी प्रभावकारी व्यवस्थापन गर्नु रहेको आयोजकले जनाएको छ। नगरभित्र कुपोषण न्यूनीकरणका लागि स्वास्थ्यकर्मी तथा पोषणसम्बन्धी फोकल पर्सनहरूको क्षमता अभिवृद्धि गर्ने लक्ष्यसहित तालिम आयोजना गरिएको हो।
तालिमको सहजिकरण लहान नगरपालिकाका स्वास्थ्य शाखा प्रमुख बिन्देश्वर चौधरी र विजय कुमार मण्डलले गरिरहेका छन्। त्यसैगरी, हेलेन केलर इन्टरनेशनलका अमित राज शाहले प्राविधिक सहयोग प्रदान गरिरहेका छन्। कार्यक्रम दलित विकास मञ्चका संयोजक खगेन्द्र बिष्टको संयोजनमा सञ्चालन भइरहेको छ भने DDF प्रतिनिधि सुनिल कुमार यादवको पनि सहभागिता रहेको छ।
तालिममा नगरभरिका पोषणसम्बन्धी फोकल पर्सनहरू गरी २६ जनाको सहभागिता रहेको छ। प्रारम्भमा २९ जनाको सहभागिता रहने अपेक्षा गरिएको थियो। सहभागीलाई कुपोषणको पहिचान, उपचार, पोषण परामर्श तथा समुदायमा सचेतना अभिवृद्धि गर्ने विषयमा प्रशिक्षण दिइँदैछ।
दलित विकास मञ्चका कार्यकारी निर्देशक संजय कुमार महराका अनुसार उक्त तालिम शनिबार सम्पन्न हुनेछ। उनले यस कार्यक्रमबाट नगरस्तरमा कुपोषण नियन्त्रणमा महत्वपूर्ण सहयोग पुग्ने विश्वास व्यक्त गरे।