शिक्षा र स्वास्थ्यलाई संगै अघि बढाउँदै सिटी ग्लोबलको सामाजिक

महेश सिंह, लहान – प्रजातन्त्र दिवसको अवसर पारेर सिटी ग्लोबल पब्लिक स्कुल ले परम्परागत औपचारिक कार्यक्रमभन्दा फरक ढंगले “सिकाइ र सेवाको समन्वय” प्रस्तुत गरेको छ। लहान नगरपालिका–११ स्थित विद्यालय परिसरमा आयोजित विज्ञान तथा सिर्जनात्मक कला प्रदर्शनीसँगै निःशुल्क स्वास्थ्य शिविर सञ्चालन गरेर विद्यालयले शिक्षा र सामाजिक उत्तरदायित्वलाई एकै मञ्चमा उभ्याएको हो।
कक्षा १ देखि ८ सम्म अध्ययनरत करिब ३ सय विद्यार्थीले स्थानीय स्रोत सामग्री प्रयोग गरी तयार पारेका वैज्ञानिक नमुना, वातावरण संरक्षणसम्बन्धी परियोजना, सौर्य ऊर्जा, जलचक्र, विद्युतीय सर्किटलगायतका प्रयोगात्मक सामग्री प्रदर्शन गरेका थिए। कलातर्फ चित्रकला, हस्तकला र सांस्कृतिक झल्को दिने सिर्जनाहरूले अवलोकनकर्ताको ध्यान खिचेको थियो। विद्यार्थी स्वयंले आफ्ना परियोजनाबारे व्याख्या गर्दै प्रयोगात्मक सिकाइको उदाहरण प्रस्तुत गरेका थिए।
कार्यक्रमको उद्घाटन महेश प्रसाद चौधरी ले पानसमा दीप प्रज्वलन गरी गरेका थिए। उनले विद्यालय शिक्षा व्यवहारिक र प्रयोगमुखी हुनुपर्नेमा जोड दिँदै यस्ता कार्यक्रमले विद्यार्थीको आत्मविश्वास र समस्या समाधान क्षमतामा टेवा पुर्‍याउने बताए। नगरपालिकाले शिक्षा क्षेत्रको गुणस्तर वृद्धिमा सहकार्य गर्ने प्रतिबद्धता समेत व्यक्त गरिएको थियो।
विद्यालयका संस्थापक प्रिन्सिपल विरेन्द्र कुमार चौधरीले किताबी ज्ञानसँगै अतिरिक्त क्रियाकलाप अपरिहार्य रहेको उल्लेख गर्दै समग्र व्यक्तित्व विकास नै विद्यालयको लक्ष्य भएको बताए। संस्थापक रामानन्द चौधरीले पनि विद्यार्थीको लुकेको प्रतिभा पहिचान र प्रोत्साहनका लागि यस्ता कार्यक्रमलाई निरन्तरता दिइने जानकारी दिए।
उक्त अवसरमा विद्यालयले निःशुल्क स्वास्थ्य शिविरसमेत सञ्चालन गरेको थियो, जहाँ अभिभावक र स्थानीयवासीले रक्तचाप तथा मधुमेह परीक्षण गराएका थिए। शिक्षा संस्थाले समुदायसँग प्रत्यक्ष सरोकार राख्दै स्वास्थ्य जाँचजस्ता कार्यक्रम सञ्चालन गर्नुले विद्यालयको सामाजिक प्रतिबद्धता झल्काएको सहभागीहरूको भनाइ थियो।
शिक्षिका वैशाली चौधरीको स्वागत मन्तव्यबाट सुरु भएको कार्यक्रममा विद्यार्थीहरू स्वयंले उद्घोषण गरेका थिए। विभिन्न शिक्षाविद्, अभिभावक, स्थानीय अगुवा र सञ्चारकर्मीहरूको उपस्थिति रहेको कार्यक्रमले विद्यालय परिसरलाई उत्साहपूर्ण र सिर्जनशील वातावरणमा परिणत गरेको थियो।
प्रदर्शनी र स्वास्थ्य शिविरको संयोजनले विद्यालयलाई केवल अध्ययन केन्द्र होइन, समुदायसँग जोडिएको शैक्षिक–सामाजिक संस्थाका रूपमा प्रस्तुत गरेको देखिन्छ।