महेश सिंह लहान सिरहा- सिरहा जिल्लाको बेतहा स्थित श्री चक्रेश्वर माध्यमिक विद्यालय तथा पूर्व विद्यार्थी मञ्चको आयोजनामा “वृहत् पुनर्मिलन कार्यक्रम–२०८२” भव्य तथा ऐतिहासिक रूपमा सम्पन्न भएको छ।
२०५२ सालदेखि २०८२ सालसम्म विद्यालयसँग आबद्ध पूर्व शिक्षक, विद्यार्थी, विद्यालय व्यवस्थापन समिति, शिक्षक–अभिभावक संघ तथा स्थानीय सरोकारवालाहरूको उल्लेख्य सहभागिता रहेको कार्यक्रममा भावुकता र उत्साह दुवै देखिएको थियो।
कार्यक्रम विद्यालय व्यवस्थापन समितिका अध्यक्ष तथा पूर्व विद्यार्थी श्री सुमन दाहालको अध्यक्षतामा सम्पन्न भएको हो भने सम्बन्धित स्थानीय तहका अध्यक्ष श्री भगवान अधिकारी प्रमुख अतिथिका रूपमा सहभागी रहनु भएको थियो। कार्यक्रममा विद्यालयको शैक्षिक इतिहास, उपलब्धि र चुनौतीबारे विस्तृत छलफल गरिएको थियो।
सो अवसरमा विद्यालयको पहिलो SLC ब्याच (२०५२–२०५३) लाई अध्यापन गराउने इङ्ग्लिश शिक्षकलाई विशेष सम्मान गरिएको थियो। सम्मान कार्यक्रमले विद्यालयको शैक्षिक जग बसाल्ने शिक्षकहरूको योगदानलाई स्मरण गराउँदै भावी पुस्ताका लागि प्रेरणाको सन्देश दिएको सहभागीहरूको भनाइ थियो।
विद्यालयका प्रधानाध्यापक श्री हरि प्रसाद घिमिरेले विद्यालयको यात्रामा योगदान पुर्याउने सबै शिक्षक, विद्यार्थी, अभिभावक तथा सहयोगी हातहरूलाई धन्यवाद ज्ञापन गर्दै यस्ता कार्यक्रमले विद्यालय र समुदायबीचको सम्बन्ध थप मजबुत बनाउने विश्वास व्यक्त गर्नुभयो।
पूर्व शिक्षक र विद्यार्थीहरूले पुनर्मिलन कार्यक्रमलाई अविस्मरणीय क्षणको संज्ञा दिँदै शिक्षा, अनुशासन र संस्कारले आफूहरूको जीवन दिशा निर्धारण गरेको अनुभव साटासाट गरेका थिए। कार्यक्रमले श्री चक्रेश्वर माध्यमिक विद्यालयको गौरवशाली इतिहासलाई पुनः स्मरण गराउँदै भावी शैक्षिक उन्नयनका लागि सामूहिक प्रतिबद्धताको सन्देश दिएको छ।
Discussion about this post