महेश सिंह लहान सिरहा-सप्तरी-केयर नेपालको आर्थिक सहयोगमा राष्ट्रिय कृषक समूह महासंघ नेपालले सिरहा र सप्तरी जिल्लाका महिला तथा पुरुष किसानलाई लक्षित गर्दै जलवायु मैत्री गाउँ परियोजना अन्तर्गत किसान सशक्तीकरण तथा गहुँको बीउ उत्पादन, प्रशोधन र बजार व्यवस्थापन सम्बन्धी दुई दिने तालिम मङ्गलबार सम्पन्न गर्ने भएको छ।
तालिम कार्यक्रममा सिरहा जिल्लाको भगवानपुर गाउँपालिका र सखुवानान्कारकट्टी गाउँपालिका तथा सप्तरी जिल्लाको उपनी गाउँपालिका र अगिन साईर कृष्ण सावर्ण गाउँपालिकाका किसानहरूको सहभागिता रहेको छ। तालिममार्फत जलवायु परिवर्तनको असर न्यूनीकरण गर्दै उत्पादनमुखी, व्यवसायिक र बजारकेन्द्रित कृषि अभ्यासबारे किसानलाई व्यावहारिक ज्ञान प्रदान गरिएको छ।
राष्ट्रिय कृषक समूह महासंघ नेपालकी मूल्यांकन तथा अनुगमन अधिकृत दीप्ती तिमल्सिनाका अनुसार तालिमले किसानलाई उन्नत बीउ उत्पादन, गुणस्तरीय प्रशोधन र बजार पहुँचमा सक्षम बनाउने उद्देश्य राखेको छ। “किसानलाई आत्मनिर्भर र व्यवसायी बनाउँदै समृद्ध किसानतर्फ अघि बढाउनु नै परियोजनाको मुख्य लक्ष्य हो,” उनले बताइन्।
महासंघले पछिल्लो लामो समयदेखि किसानको हक–हित, क्षमता अभिवृद्धि तथा जीवनस्तर उकास्ने उद्देश्यसहित विभिन्न कार्यक्रम सञ्चालन गर्दै आएको छ। जलवायु परिवर्तनको चुनौतीबीच पनि दिगो कृषि प्रणाली विकासमा यो परियोजनाले महत्वपूर्ण योगदान पुर्याउने विश्वास गरिएको छ।
तालिमबाट सहभागी किसानहरूमा उत्साह थपिएको छ भने स्थानीय तहमा जलवायु अनुकूल कृषि अभ्यास विस्तार हुने अपेक्षा गरिएको छ।
Discussion about this post