आपतकालीन तयारीको सशक्त उदाहरण : लहानमा युवाको अग्रसरतामा वृहत रक्तदान

महेश सिंह लहान-आपतकालीन अवस्थामा रगतको अभाव हुन नदिन समुदाय स्वयं अघि सर्नुपर्ने सन्देशसहित लहानमा वृहत स्वेच्छिक रक्तदान शिविर सफलतापूर्वक सम्पन्न भएको छ।
सप्तऋषि अस्पताल प्रालि, लहान–३, मेडिकल इन्स्टिच्युट लहान तथा वाटिका टुरिजम एण्ड फनपार्कको संयुक्त आयोजनामा, नेपाल रेडक्रस सोसाइटी रक्त सञ्चार केन्द्र लहानको प्राविधिक सहयोगमा सोमबार अस्पताल परिसरमा रक्तदान कार्यक्रम आयोजना गरिएको हो।

कार्यक्रममा विभिन्न क्षेत्रका युवा–युवती, सामाजिक अभियन्ता तथा स्वास्थ्यकर्मीहरूको उल्लेखनीय सहभागिता रहेको थियो। सहभागीहरूले उत्साहपूर्वक रक्तदान गर्दै मानव जीवन रक्षाका लागि नियमित रक्तदान आवश्यक रहेको सन्देश दिएका थिए। आयोजकका अनुसार शिविरमा ५३ जनाले स्वेच्छिक रूपमा रक्तदान गरेका छन्।

कार्यक्रमलाई सफल बनाउन रक्त सञ्चार केन्द्र लहानका इन्चार्ज श्री प्रदीप यादवसहित सम्पूर्ण कर्मचारी टोलीको महत्वपूर्ण भूमिका रहेको थियो। त्यस्तै मेडिकल इन्स्टिच्युट लहानकी शिक्षालय प्रमुख श्रीमती कमला आचार्य, वाटिका टुरिजम एण्ड फनपार्कका म्यानेजर श्री दीपक यादव, तथा सप्तऋषि अस्पतालका सम्पूर्ण चिकित्सक तथा कर्मचारीबर्गको सक्रिय सहभागिताले कार्यक्रमलाई थप प्रभावकारी बनाएको आयोजकले जनाएको छ।

स्थानीयवासीहरूका अनुसार यस्ता रक्तदान कार्यक्रमले समुदायमा आपतकालीन सचेतना बढाउनुका साथै युवाहरूलाई समाजसेवामा प्रेरित गर्ने महत्वपूर्ण भूमिका खेल्ने गरेको छ। आयोजक संस्थाहरूले आगामी दिनमा पनि यस्ता मानवीय कार्यक्रमलाई निरन्तरता दिने प्रतिबद्धता जनाएका छन्।