छोरीको खोजीमा आमाको गुहार : कडरबोना प्रहरीले अपराधीलाई संरक्षण गरेको परिवारको दाबी

महेश सिंह  सिरहा – सुरुङ्गा नगरपालिका–८ महुलियाकी निलम कुमारी राम छठ पर्वको राति स्थानीय शिवकुमार रामसहित तीन जनाको समूहद्वारा अपहरण शैलीमा लगिएको परिवारको गुनासो छ। छठ पूजा स्थल (घाट) नजिकैबाट किशोरीलाई जबर्जस्ती लैजाने योजना अनुसार घटना भएको पीडित परिवारले आरोप लगाएका छन्।

अपहरणपछि न्यायको माग गर्दै इलाका प्रहरी कार्यालय कडरबोना पुगेका पीडित परिवारलाई प्रहरी निरीक्षक गजेन्द्र रायको कमान्डमा रहेका फाँटका प्रहरीले उल्टै हप्काउँदै मानसिक यातना दिएको पीडितको भनाइ छ।

पीडितकी आमा र भाइ जाहेरी दर्ता गराउन पटक–पटक प्रहरी कार्यालय पुगे पनि
फाँटका प्रहरीले बिचौलियासँग मिलेर मुद्दा दर्तामा ढिलाइ गरेको र अपराधी खोजीमा कत्तिपनि चासो नदेखाएको आरोप उनीहरूले लगाएका छन्।

यस विषयमा बुझ्दा प्रहरी निरीक्षक रायले आफू मिडियामा बोल्न नपाउने बताउँदै,
“हाम्रो अनुसन्धान जारी छ,” भन्ने मात्र प्रतिक्रिया दिए।

महिना बितिसक्दा पनि आरोपीहरू पक्राउ नपरेपछि पीडित परिवारको प्रहरीप्रतिको भरोसा र विश्वास कमजोर बन्दै गएको छ।
अपहृत किशोरीकी आमा छोरीको खोजीमा चारैतिर गुहार लगाइरहेकी छन्। परिवारका अनुसार शिवकुमार रामले यस्तै प्रकृतिका घटना समाजमा पहिले पनि गरेको परेको छ।
पीडितले सप्तरी प्रहरी प्रशासनले अपराधीलाई संरक्षण गरेको कठिन आरोप लगाउँदै छोरीलाई सुरक्षित रूपमा फिर्ता ल्याउन तत्काल कदम चाल्न माग गरेका छन्।