अयाेध्यानगर–७ मा ७० किशोरीलाई आत्मरक्षा तालिम

महेश सिंह लहान सिरहा –दलित महिला केन्द्र नेपाल (CDWN) र KURVE Wustrowको सहकार्यमा सञ्चालित ‘समावेशी तथा शान्तिपूर्ण समुदायका लागि सशक्तीकरण (सशक्त)’ परियोजना अन्तर्गत अयाेध्यानगर–७, कसहास्थित श्री जनता माध्यमिक विद्यालयमा किशोरी आत्मरक्षा तालिम सुरु गरिएको छ।

पहिलो दिन सम्पन्न तालिममा ७० जना किशोरीहरूको सहभागिता रहेको कार्यक्रममार्फत आत्मविश्वास अभिवृद्धि, सुरक्षा सचेतना, जोखिम पहिचान तथा आवश्यक आत्मरक्षा सीपहरूको व्यवहारिक अभ्यास गराइएको थियो।

तालिमका प्रशिक्षक कसम कुमार लामाले दैनन्दिन जीवनमा आवश्यक पर्ने आधारभूत रक्षा–प्रविधिहरू सिकाउँदै किशोरीहरूलाई आत्मरक्षा सीपले कसरी आत्मविश्वास बढाउँछ भन्ने विषयमा मार्गदर्शन गरेका थिए।

CDWN की रिता रजकको अनुसार, परियोजनाले समुदायका किशोरीहरूलाई सुरक्षित, सचेत र सशक्त बनाउनका लागि यस्तो तालिमलाई निरन्तरता दिंदै आएको छ। स्थानीय विद्यालयमा सुरु गरिएको यो पहलले विद्यार्थी तथा अभिभावक दुवैमा सकारात्मक प्रभाव परेको बताइन्छ।