सिरहामा क्यान्सर सचेतना अभियान सशक्त बनाउन नेपाल अबुर्द रोग निवारण जिल्ला सभा सम्पन्न

महेश सिंह लहान सिराहा –नेपाल अबुर्द रोग निवारण संस्था (Nepal Cancer Relief Society) को सिरहा जिल्ला सभा औपचारिक रूपमा उधोग वाणिज्य संघ, लहानमा सम्पन्न भएको छ। जिल्लामा क्यान्सर जोखिम बढ्दै गएको सन्दर्भमा आयोजित सभाले रोकथाम, जनचेतना र प्रारम्भिक परीक्षणलाई मुख्य एजेन्डा बनाएको छ।

कार्यक्रम अध्यक्ष अशोक लाल अमातको अध्यक्षतामा तथा प्रदेश सांसद राजकुमार गुप्ताको प्रमुख आतिथ्यमा सम्पन्न भएको थियो। प्रमुख अतिथि गुप्ताले क्यान्सर रोकथाम, समयमै गरिएको जाँच र जीवनशैली सुधारका उपायहरूबारे जोड दिँदै, स्थानीय तहदेखि समुदायसम्म चेतना विस्तार गर्न संस्थाको भूमिकालाई अत्यन्त महत्वपूर्ण बताए।

अध्यक्ष अमातले सिरहामा क्यान्सर जोखिम वर्षैपिच्छे बढ्दै गएको तथ्य प्रस्तुत गर्दै, संस्थाले आगामी दिनमा जनचेतना अभियान, स्वास्थ्य परीक्षण शिविर, तथा सहयोग कार्यक्रमहरूलाई थप प्रभावकारी बनाइने जानकारी दिए।

कार्यक्रममा जिल्ला समन्वय समितिका प्रमुख दिनेश कुमार महतो, जनप्रतिनिधि, स्वास्थ्यकर्मी, सङ्घ–संस्थाका प्रतिनिधि तथा सामाजिक अभियन्ताहरूको उल्लेखनीय उपस्थिति रहेको थियो। सभाले जिल्लामा क्यान्सर रोकथाम तथा उपचार पहुँचका विषयमा सहकार्य र समन्वयलाई सुदृढ बनाउने निर्णय गरेको छ।