सिरहाको धनगढी स्तन क्यान्सरबारे जनचेतना स्वास्थ्य सचेतना अभिवृद्धि

महेश सिंह सिरहा- ग्रामिण महिला कल्याण सेवा केन्द्रको आयोजनामा महिलाहरूमा स्तन क्यान्सर सम्बन्धी जनचेतनामूलक कार्यक्रम सिरहाको धनगढीमाई नगरपालिका–११ मा सम्पन्न भएको छ।

कार्यक्रममा क्यान्सर केयर सेन्टर लहानका संस्थापक अध्यक्ष अशोक अमात्य र नेपाली कांग्रेस सिरहा जिल्ला अध्यक्ष रामचन्द्र यादवको विशेष उपस्थितिमा सहभागी महिलाहरूलाई क्यान्सर रोग, विशेषगरी स्तन क्यान्सरको जोखिम, लक्षण र रोकथामका उपायबारे विस्तृत जानकारी प्रदान गरिएको थियो।

अध्यक्ष अमात्यले स्तन क्यान्सर समयमै पत्ता लगाउन सकिएमा उपचार सम्भव हुने बताउँदै नियमित स्वास्थ्य परीक्षण र आत्म–जाँचको अभ्यास गर्नुपर्नेमा जोड दिए।उनले भने, “क्यान्सर भय होइन, चेतनाको अभावले हुने समस्या हो। समयमै पहिचान र उपचारले जीवन जोगाउन सकिन्छ।”

त्यसैगरी नेपाली कांग्रेसका जिल्ला अध्यक्ष रामचन्द्र यादवले महिलाको स्वास्थ्यलाई प्राथमिकता दिन राज्य, समाज र परिवार सबैको साझा जिम्मेवारी रहेको बताउँदै यस्ता सचेतनामूलक कार्यक्रम ग्रामीण क्षेत्रमा निरन्तर सञ्चालन गर्नुपर्ने आवश्यकता औंल्याए।

कार्यक्रममा स्थानीय महिला, स्वास्थ्यकर्मी, सामाजिक अभियन्ता र समुदायका प्रतिनिधिहरूको उल्लेखनीय सहभागिता रहेको थियो।
कार्यक्रमको अन्त्यमा सहभागी महिलाहरूले स्वास्थ्यप्रति सचेत रहँदै आफ्ना परिवार र समुदायमा पनि सचेतना फैलाउने प्रतिबद्धता व्यक्त गरे। यो कार्यक्रमलाई स्थानीय समुदायले महिला स्वास्थ्य सशक्तीकरणतर्फको सकारात्मक कदमका रूपमा सराहना गरेका छन्।