महेश सिंह लहान – धनगढीमाई नगरपालिका, सिराहामा किसानहरूको हकहितका लागि राष्ट्रिय कृषक समूह महासङ्घ, नगर महासङ्घ कार्यसमितिले मागपत्र पेश गरेको छ। किसानहरूको अधिकारमा आधारित यो मागपत्र आइतबार नगर उपप्रमुख संगिता चौधरीलाई बुझाइएको हो।
महासङ्घले प्रस्तुत गरेको मागपत्रमा किसान समूहको लेखा परीक्षण नियमित गर्नुपर्ने, कृषिमा लगाइने विभिन्न करहरू खारेज गर्नुपर्ने लगायतका मागहरू समेटिएका छन्। साथै, कृषकहरूको पहिचान सुरक्षित गर्दै उत्पादन वृद्धिका लागि आवश्यक अनुदान र सहुलियतपूर्ण ऋण व्यवस्था गर्नुपर्ने माग पनि समावेश गरिएको छ।
नगर उपप्रमुख चौधरीले पेश गरिएको मागपत्र गम्भीरतापूर्वक अध्ययन गरी सम्बद्ध निकायमा पुर्याउने र यथासक्य छिटो समाधानका लागि पहल गर्ने प्रतिवद्धता जनाइन्। उनले भनिन्, “कृषकहरू देशको मेरुदण्ड हुन्। उहाँहरूको समस्या समाधान गर्नु हाम्रो प्राथमिकता हो।”
कृषक समूह महासङ्घले किसानहरूको हकको संरक्षण, पारदर्शिता र जवाफदेहितालाई बलियो बनाउँदै स्थानीय तहसँगको सहकार्यमा कृषि क्षेत्रमा सुधार ल्याउने अभियान थालेको जनाएको छ।
Discussion about this post