प्रथम कुशहा गोल्डकप २०८१ सुरू, स्थानीय खेलकुद प्रवर्द्धनमा योगदान

महेश सिंह लहान- सुरुङ्गा नगरपालिका–५, कुशहामा स्पोर्ट एकेडेमी कुशहाद्वारा आयोजित प्रथम कुशहा गोल्डकप फुटबल प्रतियोगिता २०८१ को औपचारिक रूपमा सुरुआत भएको छ। खेलकुद मन्त्री तेजु लाल चौधरीको प्रमुख आतिथ्यमा उद्घाटन भएको प्रतियोगितामा स्थानीय खेलाडीहरूको प्रतिभा उजागर गर्ने उद्देश्य राखिएको छ।
प्रतियोगितामा दुई समूह ‘क’ र ‘ख’ अन्तर्गत आठ टोलीले प्रतिस्पर्धा गर्नेछन्। समूह ‘क’ मा अलटोकी क्लब चन्द्रपुर–८ (रौतहट), बैशाखी युवा क्लब (बर्दिबास, महोत्तरी), झुम्का एफ.सी. (सुनसरी) र एफ.सी.टी. गोलबजार (सिरहा) समावेश छन्। समूह ‘ख’ मा मल्थुम एफ.सी. (उदयपुर), स्पोर्ट एकेडेमी कुशहा (सप्तरी), धनुषा–११ (धनुषा) र विराटनगर स्पोर्ट्स एकेडेमी (मोरङ) रहेका छन्।
प्रतियोगिताको फाइनल खेल चैत २० गते हुनेछ। उद्घाटन समारोहमा नगर प्रमुख गीता चौधरी, विभिन्न वडाका अध्यक्षहरू तथा खेलप्रेमी दर्शकको उल्लेखनीय उपस्थिति थियो।
खेलकुद मन्त्री चौधरीले खेलले शारीरिक तथा मानसिक स्वास्थ्यमा मात्र नभई आम्दानी र अन्तर्राष्ट्रिय पहिचान दिलाउन महत्त्वपूर्ण भूमिका खेल्ने उल्लेख गरे। नगर प्रमुख चौधरीले खेल अनुशासन र मर्यादामा आधारित हुनुपर्ने भन्दै सहभागी टोलीलाई सफलताको शुभकामना दिइन्।
स्पोर्ट एकेडेमी कुशहाका अध्यक्ष रोशन चौधरीको अध्यक्षतामा सम्पन्न उद्घाटन समारोह ‘स्वास्थ्यका लागि खेलकुद, राष्ट्रका लागि खेलकुद’ भन्ने मूल नाराका साथ सञ्चालन गरिएको थियो। आयोजकका अनुसार प्रतियोगिताले स्थानीय खेलाडीलाई नयाँ अवसर दिने र स्थानीय स्तरमा खेलकुदको प्रवर्द्धनमा योगदान पुर्याउने विश्वास गरिएको छ।