सिरहाको चोहर्वामा ‘युगल चामल’ उत्पादन सुरु

महेश सिंह लहान सिरहा- सिरहामा नवस्थापित दयाल एग्रो फुड्स इन्डस्ट्री प्रा. लि. ले ‘युगल चामल’ ब्रान्डको उत्पादन सुरु गरेको छ। शनिबार एक विशेष समारोहबीच उद्योगको औपचारिक उद्घाटन गरिएको हो।
उद्योगका संचालक संतोष कुमार साहका अनुसार, विगत एक वर्षदेखि सञ्चालनमा रहेको उद्योगले हाल दैनिक हजारौं बोरा चामल उत्पादन गर्दै आएको छ। चामल उत्पादनका लागि आधुनिक प्रविधि र गुणस्तरीय कच्चा पदार्थ प्रयोग गरिएको उनले बताए।

स्थानीय स्तरमै चामल प्रशोधन र प्याकेजिङ गर्न थालेपछि उपभोक्ताले अब गुणस्तरीय नेपाली चामल उचित मूल्यमा पाउने उद्योगको दाबी छ। ‘हामीले बजारमा प्रतिस्पर्धी मूल्यमा उत्कृष्ट उत्पादन ल्याएका छौँ,’ संचालक साहले भने, ‘स्थानीय कृषक र उपभोक्तालाई ध्यानमा राखेर उद्योग सञ्चालन गरिएको हो।’
उद्योग सञ्चालनमा आएपछि १०० भन्दा बढी व्यक्तिले रोजगारी पाएका छन्। ‘स्थानीय युवा अब रोजगारीका लागि बाहिर जानुपर्ने बाध्यता हट्दै गएको छ,’ उद्योगका एक कर्मचारीले भने, ‘हामीले गाउँमै राम्रो अवसर पाएका छौँ।’
अर्बौं लगानीमा सञ्चालनमा आएको यस उद्योगले भविष्यमा उत्पादन क्षमता बढाउने योजना बनाएको छ। ‘गुणस्तरीय उत्पादनमार्फत उपभोक्ताको विश्वास जित्ने हाम्रो प्राथमिकता हो,’ साहले भने।

उद्योग उद्घाटन कार्यक्रममा स्थानीय प्रतिनिधि, व्यवसायी, र सयौं सर्वसाधारणको उपस्थिति रहेको थियो। सिरहाको नरहा गाउँपालिका, चोहर्वा चौकको उत्तरमा उद्योग सञ्चालनमा रहेको स्थानीय समाजसेवी विजय कुमार यादवले जानकारी दिए।