महेश सिंह लहान सिरहा –लहान नगरपालिकाका उपप्रमुख राम चलितर महतोले नगरपालिकाको नीति तथा कार्यशैलीप्रति गम्भीर असन्तुष्टि जनाएका छन्। नेपाल नेत्र ज्योति संघ सगरमाथा चौधरी आँखा अस्पताल, लहानको ४२औँ वार्षिकोत्सव समारोहमा बोल्दै उनले नगरपालिकाले जनताको सेवा गर्नुको सट्टा दुःख दिने काम गरिरहेको आरोप लगाए।
लहानको खुट्टि खोलामा किसानहरूको सिंचाइ आवश्यकतालाई ध्यानमा राखेर ड्याम निर्माण गरिएको थियो। तर, उपप्रमुख महतोका अनुसार नगरपालिकाले यसको उचित व्यवस्थापनमा चासो नदेखाएको कारण किसानहरू लाभ लिन सकिरहेका छैनन्। “सिंचाइ अभावका कारण किसानहरू आन्दोलन गर्न बाध्य छन्, तर सुन्ने कोही छैन,” उनले भने।
स्थानीय किसानहरू वर्षौंदेखि सिंचाइ समस्यासँग जुधिरहेका छन्। पर्याप्त पानी नहुँदा उत्पादन घट्दो छ, जसले उनीहरूको आर्थिक स्थितिमा प्रत्यक्ष असर पारिरहेको छ। किसानहरूले पटक–पटक नगरपालिका समक्ष गुहार मागे पनि ठोस कदम नचालिएको उनीहरूको गुनासो छ।
उपप्रमुख महतोले आफैं नगरपालिकालाई सार्वजनिक रूपमा प्रश्न उठाएपछि स्थानीय सरकारको जवाफ के आउनेछ भन्ने प्रतीक्षा गरिएको छ। किसानहरूले आशा गरेका छन् कि अब नगरपालिका उनीहरूको मागप्रति गम्भीर बन्नेछ।
Discussion about this post