महेश सिंह लहान सिरहा- समाजिक रुपान्तरणको अभियानमा सक्रिय पद्मोदय फाउन्डेसनको पहिलो वार्षिक साधारणसभा सिरहाको धनगढीमाईमा सम्पन्न भएको छ। एक वर्षअघि स्थापना भएको फाउन्डेसनले समाजसेवाका क्षेत्रमा उल्लेखनीय काम गर्दै आएको छ।
संस्थाले अपाङ्ग, गरिब, दलित र विपन्न वर्गलाई लक्षित गरी स्वास्थ्य, शिक्षा, कृषि तथा अन्य विविध क्षेत्रमा सेवा प्रदान गर्दै आएको छ। स्थानिय सरकारबाट गर्न नसकिएका कार्यहरूलाई संस्थाले प्रभावकारी रूपमा सम्पन्न गर्दै आएको फाउन्डेसनका अध्यक्ष दिपेन्द्र महतोले बताए।
शनिबार धनगढीमाईमा आयोजित साधारणसभामा समाजका विभिन्न क्षेत्रका विशिष्ट व्यक्तित्वहरूको उपस्थिति थियो। सभाको उद्घाटन शारीरिक रूपमा अपाङ्गता भएका स्थानिय शिक्षक शम्भु प्रसाद यादवले पानसमा मैनवती बालेर गरेका थिए।
कार्यक्रममा धनगढीमाईका पूर्व नगर प्रमुख हरी नारायण चौधरी, एमाले नेता राज कुमार साह अनिरुद्ध, कांग्रेस नेता पंचलाल महतो, एमाले नेतृ शोभा बराल, वडाध्यक्षहरू, समाजसेवी तथा विभिन्न पेशाकर्मीहरूको उपस्थिति रहेको थियो।
कार्यक्रममा सहभागीहरूले फाउन्डेसनले समाजसेवामा पुर्याएको योगदानको प्रशंसा गर्दै आगामी दिनमा अझ प्रभावकारी कार्यक्रमहरू सञ्चालन गर्न सुझाव दिएका थिए।
साधारणसभाले हालको कार्यसमितिलाई निरन्तरता दिँदै ११ सदस्यीय कार्यसमिति चयन गरेको छ। संस्थाका सचिव राज कुमार साहका अनुसार, फाउन्डेसनले समाजमा उल्लेखनीय योगदान पुर्याउने योजनासहित अगाडि बढ्नेछ।
संस्थाले विभिन्न जिल्लामा स्वास्थ्य शिविर, छात्रवृत्ति वितरण, महिला उद्यमशीलता प्रवर्द्धन, अपाङ्गता सहयोग कार्यक्रम लगायत विभिन्न परियोजना सञ्चालन गर्दै आएको छ। सचिव साहका अनुसार, फाउन्डेसनले भारतको चर्चित ‘जेन’ कार्यक्रम जस्तै उदाहरणीय कार्यक्रम सञ्चालन गर्ने लक्ष्य राखेको छ।
संस्थाले आगामी दिनमा समाजसेवा अझ प्रभावकारी बनाउने प्रतिबद्धता जनाएको छ। स्वास्थ्य, शिक्षा, कृषि र युवासँग सम्बन्धित कार्यक्रमहरूलाई प्राथमिकता दिने अध्यक्ष महतोले बताए।
संस्थाले पछिल्लो एक वर्षमा सिरहा, सप्तरी लगायत विभिन्न जिल्लामा विपन्न परिवारलाई आर्थिक सहायता, खाद्यान्न, लत्ताकपडा र स्वास्थ्य सामग्री वितरण गर्दै आएको छ।
संस्थाले छोटो समयमै समाजमा प्रभावकारी काम गर्दै चर्चा कमाएको छ। फाउन्डेसनका पदाधिकारीहरूका अनुसार, स्थानिय सरकारबाट गर्न नसकिएका कार्यहरूलाई समेत प्रभावकारी रूपमा सम्पन्न गर्ने संस्थाको लक्ष्य छ।
साधारणसभा नेपाल रेडक्रस सोसाइटी उपशाखा धनगढीमाईको सभा हलमा सम्पन्न भएको थियो।
संस्थाले आगामी दिनमा स्वास्थ्य, शिक्षा, रोजगारी, अपाङ्गता, महिला सशक्तीकरण लगायत क्षेत्रमा केन्द्रित रहेर कार्य गर्ने योजना बनाएको छ। संस्थाका गतिविधिहरू प्रति स्थानीय बासिन्दा उत्साहित देखिएका छन्।
Discussion about this post