मौहलीमा लघुवित्त शोषणविरुद्ध संघर्ष समितिको तयारी बैठक,पुष ७ को माइतीघर आमसभाको तयारी तीव्र

महेश सिंह लहान सप्तरी- लघुवित्त तथा वित्तीय शोषणविरुद्ध संघर्ष समितिले पुष ७ गते संघीय राजधानी काठमाडौंको माइतीघर मण्डलामा आयोजना हुने विशाल आमसभाको तयारी स्वरूप सप्तरीको मौहलीमा तयारी बैठक सम्पन्न गरेको छ।
बैठकमा संघर्ष समितिका जिल्ला अध्यक्ष बिनोद चौधरीले लघुवित्त संस्थाहरूको नाममा भइरहेका वित्तीय शोषण, मनपरी ब्याजदर, दबाब र अन्यायपूर्ण व्यवहारविरुद्ध पीडितहरूको आवाज संघीय राजधानीसम्म पुर्‍याउने उद्देश्यले आमसभा आयोजना गर्न लागिएको जानकारी दिए। उनले आमसभामा अधिकतम सहभागिता सुनिश्चित गर्न गाउँ–गाउँ तथा घर–घरबाट काठमाडौं केन्द्रित आन्दोलनमा सहभागी हुन आह्वान गरे।
तयारी बैठकमा मधेस प्रदेश इन्चार्ज अर्जुन विश्वकर्मा, प्रदेश अध्यक्ष धनिक लाल चौधरी, प्रदेश नेतृ रुपा चौधरी, पूर्व जिल्ला अध्यक्ष अनिता चौधरीलगायत विभिन्न स्थानबाट आएका पीडितहरूको उल्लेखनीय उपस्थिति रहेको थियो। वक्ताहरूले लघुवित्त संस्थाहरूले गरिरहेको आर्थिक शोषणले सर्वसाधारणको जीवन कष्टकर बनेको उल्लेख गर्दै यसविरुद्ध एकजुट भएर संघर्ष गर्नुपर्नेमा जोड दिए।
कार्यक्रममा सहभागी पीडितहरूले आफ्ना अनुभव साझा गर्दै राज्यले लघुवित्त क्षेत्रमा देखिएका विकृति र विसंगति अन्त्यका लागि तत्काल प्रभावकारी नीति र नियमन गर्नुपर्ने माग गरे। बैठकले पुष ७ गते हुने माइतीघर मण्डलाको आमसभालाई ऐतिहासिक र प्रभावकारी बनाउन व्यापक जनसहभागिता जुटाउने निर्णयसमेत गरेको छ।
संघर्ष समितिका अनुसार उक्त आमसभा लघुवित्त पीडितहरूको साझा आवाजलाई राष्ट्रिय तहमा स्थापित गर्ने महत्वपूर्ण कदमका रूपमा रहने विश्वास व्यक्त गरिएको छ।