महेश सिंह लहान सिरहा –लहान सिटी जेसीजले आयोजना गरेको जेसीज सप्ताह–२०२५ अन्तर्गत बसन्त वक्तृत्वकला प्रतियोगिता शुक्रबार लहानमा सम्पन्न भएको छ। विविध विद्यालयका विद्यार्थीहरूको सहभागितामा सम्पन्न यो प्रतियोगितामा बालबालिकाले सामाजिक, शैक्षिक र नेतृत्व मूल्य सम्बन्धी विषयमा विचार प्रस्तुति गरे।
कार्यक्रमले विद्यालय तहका विद्यार्थीमा आत्मविश्वास, वक्तृत्व कौशल र विश्लेषण क्षमता अभिवृद्धि गर्ने उद्देश्य राखिएको आयोजकले जनाएको छ। प्रतिस्पर्धीहरूले राष्ट्रिय मुद्दादेखि समाजपरिवर्तनसम्मका विषय उठाउँदै प्रभावकारी प्रस्तुति दिएका थिए।
प्रतियोगिता लहान सिटी जेसीजका अध्यक्ष जेसी दीपक लाल मकटको प्रमुख उपस्थितिमा सम्पन्न भएको थियो। संयोजक जेसी आइ. हिरालाल काज्मीको समन्वयमा चलेको कार्यक्रममा उत्कृष्ट प्रस्तुति दिने विद्यार्थीलाई प्रमाणपत्र तथा पुरस्कार प्रदान गरिएको थियो। निर्णायक मण्डलले प्रस्तुतिहरू सशक्त, प्रभावकारी र विषयगत स्पष्टतायुक्त रहेको उल्लेख गर्यो।
कार्यक्रममा ग्रेस मुरारका मावि लहान, स्थानीय सामाजिक संस्था, निजी क्षेत्रका प्रतिनिधि तथा सह–आयोजक संस्थाहरूको सक्रिय भूमिका रहेको थियो। उनीहरूका अनुसार यस्ता कार्यक्रमले विद्यार्थीमा सकारात्मक प्रतिस्पर्धा र नेतृत्व क्षमताको विकासमा महत्वपूर्ण प्रभाव पार्दछ।
प्रतियोगितामा सहभागी विद्यार्थी, अभिभावक तथा विद्यालय प्रतिनिधिहरूले कार्यक्रमले विद्यार्थीमा सृजनशीलता, अनुसन्धान सोच र सार्वजनिक बोल्ने क्षमतामा थप प्रेरणा दिएको बताए। जेसीजले आगामी दिनमा युवामुखी कार्यक्रमलाई अझै विस्तारित रूपमा सञ्चालन गर्ने प्रतिबद्धता जनाएको छ।
Discussion about this post