लहान–९ : स्वावलम्बन र महुली लघुवित्तका महिला समूह नयाँ भवनमा विधिवत् प्रवेश

महेश सिंह लहान सिरहा-स्वावलम्बन लघुवित्त वित्तीय संस्था र महुली लघुवित्तद्वारा सञ्चालित लहान–९ का महिला समूहहरू आजदेखि नव–निर्मित भवनमा विधिपूर्वक प्रवेश गरेका छन्। नयाँ भवनको औपचारिक उद्घाटन वडाध्यक्ष घुरन चौधरीले रिबन काटेर गरेका हुन्।

उद्घाटन समारोहमा प्रमुख अतिथि चौधरीले महिला समूहको सक्रियता, आर्थिक सशक्तीकरणमा लघुवित्तको भूमिकाको प्रशंसा गर्दै नयाँ भवनले आगामी दिनमा योजनाबद्ध बैठक, तालिम तथा आर्थिक क्रियाकलापलाई अझ व्यवस्थित र प्रभावकारी बनाउने विश्वास व्यक्त गरे।

दुवै लघुवित्तका समूह संयोजकहरूले भवन निर्माणमा सहयोग गर्ने सबैप्रति धन्यवाद ज्ञापन गर्दै स्थायी कार्यालय व्यवस्थापनले महिलाहरूको नेतृत्व विकास र उद्यमशीलता प्रवर्द्धनमा टेवा पुग्ने बताए। कार्यक्रममा स्थानीय जनप्रतिनिधि, महिला समूहका सदस्य तथा सर्वसाधारणको उल्लेख्य उपस्थिती रहेको थियो।