लक्ष्मीपुर पतारीमा महिला किसान उत्साहित, गहुँ उत्पादन वृद्धिमा सहयोग पुग्ने अपेक्षा

महेश सिंह लहान- JP RWEE (Joint Programme on Rural Women Economic Empowerment) कार्यक्रम अन्तर्गत सोमबार वडा क्षेत्रमा १५ वटा महिलामुखी कृषक समूहका ४५० महिला सदस्यलाई निःशुल्क गहुँको बिउ वितरण गरिएको छ। कुल ५४०० किलो (५४ क्विन्टल) गहुँको बिउ वितरण कार्यक्रम वडा अध्यक्ष ब्रह्मदेव यादवको प्रमुख उपस्थितिमा सम्पन्न भएको हो।

वडा अध्यक्ष यादवका अनुसार महिला कृषकलाई गुणस्तरीय बिउ प्रदान गर्नु कार्यक्रमको मुख्य उद्देश्य हो, जसले ग्रामीण महिलाको आर्थिक सशक्तीकरणका साथै उत्पादन वृद्धिमा महत्वपूर्ण प्रभाव पार्ने अपेक्षा गरिएको छ।

बिउ वितरण पाएपछि कृषक महिलाहरू खुशी व्यक्त गर्दै आगामी वर्षको गहुँ उत्पादनमा सकारात्मक परिणाम आउने विश्वास व्यक्त गरेका छन्। कृषक महिलाले निःशुल्क प्राप्त भएको बिउले कृषि लागत कम भई उत्पादनमा वृद्धि हुनसक्ने बताएका छन्।

स्थानीय सरकारले कृषि आधुनिकीकरण र महिलाको भूमिका सुदृढीकरणलाई प्राथमिकतामा राख्दै यस्ता कार्यक्रम निरन्तर सञ्चालन गरिने जनाएको छ।