सिरहामा सुनचाँदी व्यवसायी आन्दोलित, साँचो बुझाउँदै प्रशासनलाई विरोध

महेश सिंह लहान,सिरहा-सिरहा जिल्लाभरिका सम्पूर्ण सुनचाँदी व्यवसायिक प्रतिष्ठानहरूले आज जिल्ला प्रशासन कार्यालयमा आफ्ना पसलको साँचो बुझाउने विरोध कार्यक्रमको आयोजना गरेका छन्।
राज्यले सुरक्षा प्रत्याभूति नदिएको, चोरी लुटपाट लगायतका घटनामा दोषीहरूलाई कानूनी कारबाही नहुँदा आक्रोशित हुँदै यस्तो कदम चाल्नुपरेको बताएका छन्।
कार्यक्रमबारे जानकारी दिँदै उद्योग वाणिज्य संघ सिरहा लहानका अध्यक्ष तथा सुनचाँदी व्यवसायी बिकास सारडाले भने, “हामी व्यवसायीहरू लामो समयदेखि शान्तिपूर्णरूपमा आफ्ना माग राख्दै आएका थियौं। तर राज्यबाट कुनै सुनुवाइ नभएपछि बाध्य भएर यो साँचो बुझाउने अभियान थालेका हौं।”
उनले प्रशासनसँग बारम्बारको समन्वय प्रयास निष्फल भएपछि व्यवसायीहरू आन्दोलित भएको स्पष्ट पारे। व्यवसायीहरूका अनुसार चोरी, लुटपाट र धम्कीका घटनामा पीडितले न्याय पाउन नसक्दा जिल्लामा व्यवसाय गर्नै नसक्ने अवस्था सिर्जना भएको छ। यसबीच जिल्ला प्रशासन कार्यालयले आन्दोलनलाई संवेदनशील रूपमा लिँदै आवश्यक सुरक्षा उपायहरू अपनाइने संकेत दिएको छ।