जलवायु मैत्री गाउँ निर्माणका लागि दुई दिने कार्यशाला सम्पन्न

महेश सिंह लहान, सिरहा- “सशक्त, समृद्ध, सम्मानित किसान : सबल महासंघ” भन्ने नारासहित सिरहा र सप्तरीका ६ वटा पालिकामा लक्षित वार्षिक प्रगति समीक्षा तथा कार्ययोजना निर्माण कार्यशाला सम्पन्न भएको छ। जलवायु मैत्री गाउँ नेपाल (CSWN) परियोजनाअन्तर्गत लहानमा जेठ २८ र २९ गते आयोजित दुई दिने कार्यक्रम राष्ट्रिय कृषक समूह महासंघ नेपालको आयोजनामा सम्पन्न भएको हो।

रुपनी, लक्ष्मीपुर पतारी, सखुवानन्कारकट्टी, भगवानपुर, धनगढीमाई र अग्नीसाइर कृष्णासवरन—यी पालिकाहरूमा जलवायु परिवर्तन न्यूनीकरण तथा अनुकुलन कार्यलाई स्थानीय तहको सहकार्यमा अघि बढाउने उद्देश्यले कार्यक्रम गरिएको हो।

कार्यक्रममा गड्डीयौला मल उत्पादन, गोठ सुधार, साना सिँचाइ प्रणाली र एकीकृत कीट व्यवस्थापन (IPM) जस्ता जलवायु अनुकुलन अभ्यासबारे कार्यशाला सञ्चालन गरिएको थियो।

कार्यक्रममा सिरहा र सप्तरी जिल्लाबाट अगुवा किसान, सरोकारवाला निकायका प्रतिनिधि गरी जम्मा ७५ जना सहभागी थिए। केयर नेपालको आर्थिक तथा प्राविधिक सहयोगमा सम्पन्न कार्यक्रममा सहभागीहरूले जलवायुमैत्री कृषि अभ्यासमा आफूलाई थप सशक्त बनाउने प्रतिबद्धता व्यक्त गरेका थिए।
महासंघका मधेस प्रदेश संयोजक दिलिप कुमार साहका अनुसार कार्यशालाबाट स्थानीय पालिकासँगको समन्वय अझ बलियो बनाउने र जलवायु परिवर्तनको असर न्यूनिकरणमा कृषकहरूको नेतृत्व सुनिश्चित गर्ने कार्ययोजना तय गरिएको छ।