लहानमा श्रमिक हक अधिकार विषयक अन्तरक्रिया

महेश सिंह लहान-आइतबारका दिन एक्सनएड नेपालको सहयोगमा र दलित जनकल्याण युवा क्लबको आयोजनामा सञ्चालित स्थानीय अधिकार कार्यक्रम अन्तर्गत श्रमिक सरोकारबाला समूहसँग अन्तरक्रिया कार्यक्रम सम्पन्न भएको छ।
लहान नगरपालिका कार्यालय परिसरमा सम्पन्न कार्यक्रम श्रमिक सञ्जालकी अध्यक्ष सोनिया सदाको अध्यक्षतामा सम्पन्न भएको हो। कार्यक्रममा श्रम अनुगमन प्रतिवेदनको आधारमा स्थानीय सरोकारवालासँग छलफल तथा अन्तरक्रिया गरिएको थियो।
कार्यक्रममा लहान नगरपालिकाका उप-प्रमुख रामचलितर महतो, प्रमुख प्रशासनिक अधिकृत जयकान्त झा, वडा अध्यक्ष धनिकलाल यादव, सञ्चारकर्मीहरू, साथै उल्लेखनीय श्रमिक महिला सदस्यहरूको समेत उल्लेखनीय सहभागिता रहेको दलित जनकल्याण युवा क्लबका सामाजिक परिचालक राजकुमार पासवानले जानकारी दिए।
कार्यक्रमका क्रममा सुनभ चौधरीले श्रमिकहरूले राज्यले दिएको श्रम ऐनअनुसार सेवा सुविधा लिनुपर्नेमा जोड दिंदै, कृषिकर्म जस्तो जिम्मेवार पेशामा इमानदारीपूर्वक काम गर्नुपर्ने आवश्यकता औंल्याए। उनले श्रमिक अधिकारका पक्षमा यस्ता कार्यक्रमहरू निकै प्रभावकारी रहेको पनि बताए।
स्थानीय स्तरमा श्रमिकको हक अधिकारको विषयमा सचेतना अभिवृद्धि गर्ने उद्देश्यले आयोजना गरिएको यस कार्यक्रमले सहभागीहरूमा गहिरो प्रभाव पारेको सहभागीहरूको धारणा रहेको छ।