महेश सिंह सिरहा- लहान नगरपालिका–२० स्थित ब्राह्मण गोर्छारीमा रहेको माध्यमिक विद्यालय परिसरमा लहान सिटी जेसिजको आयोजना तथा वडा कार्यालयको सहकार्यमा एकदिने निःशुल्क स्वास्थ्य शिविर सम्पन्न भएको छ।
कार्यक्रम जेसिज कार्यवाहक अध्यक्ष शैगेन्द्र साहको अध्यक्षतामा सम्पन्न भएको हो। शिविरको उद्घाटन गर्दै वडा अध्यक्ष गणेश चौधरीले सामाजिक उत्तरदायित्वअन्तर्गत स्वास्थ्य शिविरको आवश्यकता औंल्याउँदै यस किसिमका कार्यले समुदायमा सकारात्मक प्रभाव पार्ने विश्वास व्यक्त गरे।
शिविरमा लहानका विभिन्न अस्पताल तथा स्वास्थ्य संस्थाबाट आएका अनुभवी चिकित्सक तथा स्वास्थ्यकर्मीहरूले सेवा दिएका थिए। जेसिजका पूर्व अध्यक्ष उमेश यादव, जेसिज सदस्यहरू रुपेश पासवान, सन्तोष यादव लगायतको उपस्थिति रहेको कार्यक्रममा गाउँका सीमान्तकृत, गरिब, दलित, वृद्धवृद्धा तथा अशक्त ८५ जना स्थानीयले सेवा लिएको जेसिज सदस्य नागेश्वर कुमार महतोले जानकारी दिए।
शिविरमा जनरल स्वास्थ्य परीक्षणसहित विशेषज्ञ चिकित्सकको परामर्श सेवा उपलब्ध गराइएको थियो। प्रमुख अतिथि चौधरीले जेसिजको सामाजिक कार्यको प्रशंसा गर्दै भविष्यमा पनि यस्ता कार्यक्रम निरन्तर गर्नुपर्ने आवश्यकता औंल्याए।
स्थानीयवासीले यस्तो स्वास्थ्य सेवा गाउँमै पाउँदा राहत महसुस भएको प्रतिक्रिया दिएका छन्।
Discussion about this post