बाआमा र घरहरू

छोरा-बुहारी यूके, अमेरिका छन्
छोरी-ज्वाईँ अष्ट्रेलिया, जापान छन्
गाउँको घरमा ताल्चा लागेको छ
बजारको घर भाडामा लागेको छ
र बाआमा छतको कुनामा मिल्किएका छन्

नाती-नातिना जन्मने बेला-
आमाको ‘शेयर भाउ’ अकासिन्छ
र ”तेलभिसा’जारी हुन्छ
यसैले बाआमा अचेल बेला-बेला
उडिरहेका पनि देखिन्छन्
घण्टौं लामा ट्रान्जिटहरुमा
उँघ्दै गरेका पनि भेटिन्छन्

प्लेनमा उड्दै गरेको अर्धनिद्रामा
ट्रान्जिटमा अड्किएको दिक्दारीमा
परदेशी भिडमा एक्लिएको बेला
बिरानो मध्याह्नमाअत्तालिएको बेला

बाआमा
कहिले चौतारीका दौंतरी सम्झन्छन्
कहिले गोठ रपँधेरा सम्झन्छन्
मन-मनै लेकबेंशी गर्छन्
खोला तर्छन् र मेला भर्छन्

तर बाको एउटा गोडा चल्न छोडिसक्यो
आमाकाआँखा धमिला-धमिला भइसके
गाउँ पुग्न बाका गोडाले दिँदैनन्
सहर डुल्न आमाकाआँखाले दिँदैनन्

यूके, अमेरिकाबाट चन्दाआएको छ
अष्ट्रेलिया, जापानबाट चन्दाआएको छ
सहरमा नयाँ वृद्धाश्रम बन्दैछ
बाका दुइटै गोडा नचल्ने भइसक्दा
आमाकाआँखा पूरै धमिलिइसक्दा
बजारको घर’उतै’बाटबिक्री भइसक्ने छ
गाउँको घरलाई पनि झाडीले छोपिसक्ने छ
र त्यति बेलासम्म,
शायद वृद्धाश्रम पनि पूरै बनीसक्ने छ