शिक्षा र संस्कारको समन्वय : मनकामना कलेजमा कक्षा १२ का विद्यार्थीको बिदाई

महेश सिंह लहान, सिरहा –लहानस्थित मनकामना कलेज मा कक्षा १२ मा अध्ययनरत विद्यार्थीहरूको बिदाई कार्यक्रम शिक्षामुखी सन्देशसहित सम्पन्न भएको छ। कलेजका प्रिन्सिपल भरत साह को अध्यक्षतामा आयोजित कार्यक्रममा विद्यार्थी, शिक्षक तथा अभिभावकबीच शैक्षिक गुणस्तर, अनुशासन र भविष्य निर्माणका विषयमा छलफलसमेत गरिएको थियो।
कार्यक्रम कक्षा ११ मा अध्ययनरत विद्यार्थीहरूले आयोजना गरेका थिए। बिदाई समारोह केवल औपचारिक कार्यक्रम मात्र नभई विद्यार्थीहरूबीच सहकार्य, नेतृत्व विकास र सामाजिक व्यवहार सिकाउने अवसरका रूपमा समेत प्रस्तुत गरिएको कलेज प्रशासनले जनाएको छ।
कलेजका शेयरधनी कमलेश यादव ले विद्यालयस्तरको शिक्षालाई व्यवहारिक र जीवनोपयोगी बनाउने दिशामा कलेजले काम गर्दै आएको बताए। उनले शैक्षिक उपलब्धिसँगै नैतिक शिक्षा र अनुशासनलाई प्राथमिकतामा राखिएको उल्लेख गरे।
यस्तै, कलेजका शेयर सदस्य विशाल साह का अनुसार कलेजको पहिलो ब्याचका रूपमा अध्ययन पूरा गर्न लागेका विद्यार्थीहरूलाई विशेष सम्मान तथा मायाको चिनो प्रदान गरिएको हो। उनले यसलाई कलेजको शैक्षिक यात्राको महत्वपूर्ण उपलब्धिका रूपमा व्याख्या गरे।
कार्यक्रममा शिक्षक–प्राध्यापकहरूले विद्यार्थीहरूलाई उच्च शिक्षामा प्रवेश गर्दा विषय छनोट, प्रतिस्पर्धात्मक वातावरण र समय व्यवस्थापनबारे सुझाव दिएका थिए। साथै, बदलिँदो शैक्षिक परिवेशमा प्रविधिमैत्री अध्ययन, सीपमूलक शिक्षा र आत्मनिर्भर बन्ने क्षमतामा जोड दिनुपर्नेमा वक्ताहरूले जोड दिएका थिए।
बिदाई समारोहका क्रममा विद्यार्थीहरूले आफ्नो अध्ययनकालका अनुभव बाँड्दै कलेजप्रति आभार व्यक्त गरेका थिए। कार्यक्रममा सहभागीहरूले कलेजको शैक्षिक गुणस्तर, अनुशासित वातावरण र परिणाममुखी शिक्षाप्रति सकारात्मक प्रतिक्रिया दिएका थिए। सिरहा जिल्लामा गुणस्तरीय शिक्षाको केन्द्रका रूपमा कलेजले पहिचान बनाउँदै गएको सहभागीहरूको भनाइ थियो।
बिदाई कार्यक्रममा भावनात्मक वातावरण देखिएको थियो। शिक्षकहरूले विद्यार्थीहरूको उज्ज्वल भविष्यको कामना गर्दै समाजमा जिम्मेवार नागरिकका रूपमा स्थापित हुन प्रेरणा दिएका थिए।