महेश सिंह लहान सिरहा – कृषकको उत्पादनलाई बजारसँग जोड्दै पोषण र जनस्वास्थ्यमा सचेतना अभिवृद्धि गर्ने लक्ष्यसहित आयोजित कृषि तथा पोषण मेला सम्पन्न भएको छ। मेलाले स्थानीय तहमा कृषि आधुनिकीकरण, उत्पादन वृद्धि र स्वस्थ जीवनशैली प्रवर्द्धनमा महत्वपूर्ण सन्देश दिएको छ।
राष्ट्रिय कृषक समूह महासंघ नेपालमा आबद्ध २७ कृषक समूहको सहभागितामा आयोजित मेलामा अन्नबाली, दलहन, तेलहन, हरियो तरकारी तथा पशुपन्छीजन्य उत्पादनहरूको प्रदर्शनी गरिएको थियो।
कृषकहरूले आफ्ना उत्पादनहरू प्रदर्शनसँगै बजार विस्तारका अवसरबारे अनुभव आदानप्रदान गरेका थिए।
मेलामा आधुनिक कृषि प्रविधि र सेवाहरूलाई विशेष प्राथमिकता दिइएको थियो। एग्रोभेटमार्फत उन्नत बीउबिजन, प्राङ्गारिक मल, कृषि औजार तथा किरानियन्त्रण प्रविधि प्रदर्शन गरिएको थियो। कृषि शाखाले माटो परीक्षण सेवा प्रदान गर्दै वैज्ञानिक खेती प्रणालीबारे जानकारी गराएको थियो भने पशु शाखाले गोबर परीक्षण तथा पशुपन्छीमा लाग्ने रोग नियन्त्रणसम्बन्धी परामर्श दिएको थियो।
स्वास्थ्य र पोषण क्षेत्रतर्फ, स्वास्थ्य शाखाले हाइट बोर्ड, मुआक टेप, औषधि तथा परिवार नियोजनका सामग्री प्रदर्शनमा राख्दै समुदायमा जनचेतना फैलाएको थियो। महिला स्वयंसेविकाहरूले पोषण बगैंचाको नमुना प्रस्तुत गर्दै सन्तुलित आहारको महत्वबारे जानकारी गराएका थिए। सरस्वती डेरी ले दूधबाट बन्ने विभिन्न परिकारहरू प्रदर्शन गरी कृषि उत्पादनको मूल्य अभिवृद्धिमा जोड दिएको थियो।
मेलामा उत्कृष्ट योगदान गर्ने १० कृषक समूहलाई सम्मान गरिएको थियो। साथै, पोषण परियोजनामा सक्रिय योगदान पुर्याएका नवीन कुमार तिवारी र अनिशा माझीलाई विशेष सम्मान प्रदान गरिएको आयोजकले जनाएको छ।
महासंघका पोषण अधिकृत आंचल खडका र मधेस प्रदेश सचिव यामुन प्रसाद यादवले कार्यक्रमको अनुगमन तथा मूल्यांकन गरेका थिए। आयोजकका अनुसार यस्ता कार्यक्रमले कृषकलाई प्रविधिमैत्री बनाउँदै उत्पादन वृद्धि, आम्दानी विस्तार र पोषण सुधारमा दीर्घकालीन प्रभाव पार्ने अपेक्षा गरिएको छ।
Discussion about this post