सल्हेश फुलवारी : किताबी ज्ञानसँगै संस्कार र सीप विकासमा विद्यालयको प्रतिबद्धता

महेश सिंह, लहान – सल्हेश फुलवारी सेकेन्डरी बोर्डिङ्ग स्कुल ले आफ्नो “तेस्रो वार्षिकोत्सव एवं अभिभावक दिवस समारोह” भव्य रूपमा सम्पन्न गरेको छ। सिरहाको लहान नगरपालिका–१२ भोटिया टोल चौकस्थित विद्यालय प्रांगणमा आयोजित कार्यक्रम उत्साह, उमंग र सांस्कृतिक प्रस्तुतीले भरिपूर्ण बनेको थियो।
विद्यालयमा हाल करिब ५०० विद्यार्थी अध्ययनरत रहेका छन्। विद्यार्थीमा निहित प्रतिभा उजागर गर्ने, उनीहरूको आत्मविश्वास अभिवृद्धि गर्ने तथा अभिभावकसँग विद्यालयको सम्बन्ध थप सुदृढ गर्ने उद्देश्यले कार्यक्रम आयोजना गरिएको विद्यालयका प्रिन्सिपल शिवकान्त चौधरीले जानकारी दिए। “विद्यालय केवल किताबी ज्ञान दिने थलो मात्र होइन, जीवन उपयोगी सीप र संस्कार सिकाउने साझा घर हो,” उनले भने।
कार्यक्रमका प्रमुख अतिथि महेश प्रसाद चौधरी ले विद्यालयको शैक्षिक तथा अतिरिक्त क्रियाकलापको प्रशंसा गर्दै गुणस्तरीय शिक्षाका लागि स्थानीय सरकार सधैं प्रतिबद्ध रहेको बताए। उनले अनुशासन, परिश्रम र लक्ष्यप्रति स्पष्ट दृष्टिकोण भए विद्यार्थीले भविष्यमा समाजमा शिर उच्चा गर्ने अवसर पाउने उल्लेख गरे।
विशिष्ट अतिथि विष्णु न्यौपाने ले वर्तमान समयमा विद्यार्थीलाई मोबाइल प्रयोगबाट टाढा राख्न र अभिभावकले नियमित निगरानी तथा मार्गदर्शन गर्न आवश्यक रहेको धारणा राखे। उनले ४–६ घन्टाको नियमित अध्ययन, समय व्यवस्थापन र सकारात्मक वातावरणले नै उज्ज्वल भविष्यको आधार तयार गर्ने बताए।
कार्यक्रममा विद्यार्थीहरूले नृत्य, गीत, नाटक, कविता वाचन तथा विभिन्न सांस्कृतिक प्रस्तुति प्रस्तुत गरेका थिए। उत्कृष्ट विद्यार्थी तथा शिक्षकहरूलाई सम्मान पत्र प्रदान गरिएको थियो भने अभिभावकहरूको उल्लेख्य उपस्थिति रहेको विद्यालय प्रशासनले जनाएको छ।
हरेक वर्षझैँ यस वर्ष पनि अनुशासित र व्यवस्थित रूपमा कार्यक्रम सम्पन्न भएको विद्यालयले जनाएको छ। विद्यालय परिवारले आगामी दिनमा अझ गुणस्तरीय शिक्षा र सिर्जनात्मक गतिविधि विस्तार गर्ने प्रतिबद्धता व्यक्त गरेको छ।