सिराहा, चैत ५ — वित्तीय सेवामा सबैको पहुँच सुनिश्चित गर्ने उद्देश्यसहित सिराहामा बहिरा विद्यार्थीहरूलाई लक्षित गर्दै समावेशी वित्तीय साक्षरता कार्यक्रम सञ्चालन गरिएको छ। विश्व वित्तीय सप्ताह २०२६ को अवसरमा सहारा नेपालद्वारा सञ्चालित होम्स नेपाल परियोजना अन्तर्गत बहिरा माध्यमिक विद्यालय, सिराहा–९ गुलरियामा आयोजित कार्यक्रमले वित्तीय शिक्षालाई पहुँचयोग्य बनाउने प्रयासलाई थप बल दिएको छ।
विशेष आवश्यकता भएका विद्यार्थीहरूलाई लक्षित गरी आयोजना गरिएको कार्यक्रममा संकेत भाषा र द्विभाषी माध्यम प्रयोग गरिएको थियो, जसले सिकाइ प्रक्रियालाई प्रभावकारी मात्र नभई समावेशी बनाएको आयोजकले जनाएको छ। कार्यक्रममार्फत बहिरा विद्यार्थीहरूलाई वित्तीय प्रणालीसँग जोड्ने र उनीहरूको आत्मनिर्भरता अभिवृद्धि गर्ने लक्ष्य राखिएको थियो।
JOA को आर्थिक सहयोग तथा ह्याबिट्याट फर ह्युमानिटी नेपाल र नेपाल बिमा प्राधिकरण मधेश प्रदेश कार्यालयको सहकार्यमा सम्पन्न कार्यक्रममा कक्षा ५ देखि १० सम्मका विद्यार्थीहरूलाई बचत, बैंकिङ सेवा, डिजिटल भुक्तानी, खर्च व्यवस्थापन र वित्तीय जोखिमबारे जानकारी दिइएको थियो।
त्यसैगरी, साना कक्षाका विद्यार्थीहरूलाई खेल र सिर्जनात्मक गतिविधिमार्फत वित्तीय अवधारणा बुझाइएको थियो। चित्रकला र रङ भराइ जस्ता अभ्यासले बालबालिकामा पैसाप्रति बुझाइ विकास गर्न मद्दत पुर्याएको बताइएको छ।
कार्यक्रममा करिब ६० जना विद्यार्थी तथा शिक्षकहरूको सहभागिता रहेको थियो। सहारा नेपालका कार्यक्रम व्यवस्थापक किशन गौतम र ह्याबिट्याट नेपालका माधव चौरेलले वित्तीय साक्षरता सम्बन्धी विभिन्न पक्षमा प्रस्तुतीकरण गरेका थिए भने बिमा प्राधिकरणका प्रतिनिधिले बिमाको महत्वबारे जानकारी गराएका थिए।
सहारा नेपालका सिराहा जिल्ला अधिकृत रामभरोसी महतोका अनुसार यस्तो कार्यक्रमले विशेषगरी बहिरा विद्यार्थीहरूलाई वित्तीय सेवामा पहुँच विस्तार गर्न सहयोग पुग्ने विश्वास गरिएको छ। कार्यक्रममा सहभागी सबै विद्यार्थीलाई शैक्षिक सामग्री समेत वितरण गरिएको थियो।
विद्यालयका प्रधानाध्यापक भोला यादवले यस्ता कार्यक्रमले समावेशी शिक्षालाई व्यवहारमा उतार्दै विद्यार्थीहरूलाई भविष्यका लागि सक्षम बनाउने धारणा व्यक्त गरे।
आयोजकका अनुसार यस्ता समावेशी कार्यक्रमहरू अन्य जिल्लामा समेत विस्तार गर्ने योजना रहेको छ, जसले वित्तीय साक्षरतालाई सबैका लागि पहुँचयोग्य बनाउने लक्ष्यमा सहयोग पुर्याउने अपेक्षा गरिएको छ।
Discussion about this post