मौन अवधिमा सुरक्षा सतर्कता कडा: नगदसहित उम्मेदवार पक्राउ प्रकरणले सिरहामा तरंग

महेश सिंह सिरहा-प्रतिनिधिसभा निर्वाचनको मौन अवधिमा सुरक्षा निकायले कडाइ बढाएका बेला सिरहा क्षेत्र नं. ३ मा अप्रत्याशित घटना सार्वजनिक भएको छ। जनता समाजवादी पार्टी नेपाल (जसपा) का उम्मेदवार अशेश्वर यादव नगदसहित नियन्त्रणमा परेपछि चुनावी वातावरणमा नयाँ तरंग पैदा भएको हो।
भारत सीमाबाट सदरमुकामतर्फ आउँदै गरेको प्र. २–०२–००१ च ०८७ नम्बरको स्कारपियो गाडीलाई राति करिब १२:३० बजे शिवचोकमा संयुक्त सुरक्षा टोलीले रोकी चेकजाँच गरेको थियो। जाँचका क्रममा गाडीबाट ४ लाख ८७ हजार रुपैयाँ नगद बरामद भएको जिल्ला प्रहरी कार्यालय सिरहाले जनाएको छ।
प्रहरीका अनुसार बरामद रकमको स्रोत खुल्न नसकेपछि उम्मेदवार यादवसहित गाडीमा सवार पाँच जनालाई नियन्त्रणमा लिइएको हो। गाडीबाट मतपत्रसमेत फेला परेको दाबी गरिएको छ, जसबारे विस्तृत अनुसन्धान भइरहेको बताइएको छ।
मौन अवधिमा कुनै पनि किसिमको प्रचार–प्रसार, प्रभाव पार्ने गतिविधि वा आचारसंहिताविपरीत काम गर्न नपाइने व्यवस्था छ। यस घटनाले निर्वाचन आचारसंहिताको कार्यान्वयन र सुरक्षा व्यवस्थाको प्रभावकारिताबारे बहस सुरु गराएको छ।
नियन्त्रणमा लिइएकाहरूलाई जिल्ला प्रहरी कार्यालयमा राखिएको छ भने आवश्यक कानुनी प्रक्रिया पूरा गरी मुख्य निर्वाचन अधिकृतको कार्यालयमा बुझाउने तयारी भइरहेको प्रहरी स्रोतले जनाएको छ।
घटनाले सिरहा क्षेत्र नं. ३ मा चुनावी सरगर्मी अझ चुलिएको छ भने मतदातामाझ पनि जिज्ञासा र चासो बढेको देखिएको छ।