शंख’ चिन्हलाई जागरण र परिवर्तनको प्रतीकका रूपमा व्याख्या : राम कुमार साह

महेश सिंह, लहान सिरहा – सिरहा निर्वाचन क्षेत्र नम्बर–१ मा चुनावी प्रतिस्पर्धा चर्किँदै जाँदा नेपालका लागि नेपाली पार्टी का उम्मेदवार राम कुमार साह ‘सनातनी’ ले आफ्नो अभियानलाई “निर्वाचन सुधार” को बहससँग जोड्ने प्रयास गरेका छन्।
अरू उम्मेदवारहरू विकासका वाचा र संगठन प्रदर्शनमा केन्द्रित भइरहेका बेला साहले मतदाताको मतदान संस्कारमै प्रश्न उठाउँदै अभियान चलाइरहेका छन्। घरदैलो कार्यक्रममा उनी खुलेरै रक्सी र पैसाको प्रभावमा मतदान गर्ने प्रवृत्तिको आलोचना गर्दै सचेत मताधिकार प्रयोग गर्न आग्रह गरिरहेका छन्। “मत भनेको पाँच वर्षको जिम्मेवारी हो, क्षणिक प्रलोभन होइन,” भन्ने सन्देश उनको मुख्य नारा बनेको छ।
साहको चुनावी रणनीति धार्मिक नाराभन्दा व्यापक सामाजिक विमर्शतर्फ उन्मुख देखिन्छ। सितापुर क्षेत्रका टोलबस्तीमा पुगेर उनले सांस्कृतिक पहिचान, परम्परा संरक्षण र राष्ट्रिय स्वाभिमानलाई राजनीतिक बहसको विषय बनाएका छन्। उनका अनुसार संस्कृति र नैतिक मूल्यको जगेर्ना बिना समृद्धि सम्भव छैन।
युवा मतदातालाई लक्षित गर्दै साहले विदेश पलायनलाई गम्भीर सामाजिक चुनौतीका रूपमा चित्रित गरेका छन्। स्थानीय स्तरमै रोजगारी सिर्जना, साना उद्योग प्रवर्द्धन र कृषि उत्पादनको मूल्य सुनिश्चितता उनका प्राथमिक एजेन्डा हुन्।
आफ्नो चुनाव चिह्न ‘शंख’ लाई उनले धार्मिक प्रतीकभन्दा पनि “जागरण र चेतनाको संकेत” का रूपमा व्याख्या गरेका छन्। समर्थकहरूले गाउँ–गाउँमा शंख चिन्हसहित प्रचार सामग्री वितरण गर्दै वैकल्पिक शक्तिको सन्देश फैलाइरहेका छन्।
बहुदलीय प्रतिस्पर्धाबीच साहले विचारधारात्मक बहस र स्वच्छ निर्वाचनको मुद्दामार्फत अलग पहिचान बनाउने प्रयास गरिरहेका छन्। सिरहा–१ मा मतदाताले परम्परागत शक्ति, विकासको वाचा वा वैकल्पिक राजनीतिक धार—कुन रोज्छन् भन्ने चासो यतिबेला केन्द्रमा छ।