औरही गाउँपालिका–४ कमलपुरमा कांग्रेसको चुनावी भेटघाट, सयौंले गरे पार्टी प्रवेश

महेश सिंह सिरहा-सिरहा जिल्लाको औरही गाउँपालिका–४ कमलपुरमा नेपाली कांग्रेसका नेता–कार्यकर्तासँग चुनावी छलफल तथा भेटघाट कार्यक्रम सम्पन्न भएको छ।
भेटघाटका क्रममा लोकतन्त्रलाई थप मजबुत बनाउने उद्देश्यसहित विभिन्न राजनीतिक दलमा आस्था राख्दै आएका करिब ५० जना व्यक्तिहरू नेपाली कांग्रेसमा प्रवेश गरेका छन्। नवप्रवेशीहरूलाई पार्टीका स्थानीय नेतृत्वले नेपाली कांग्रेसमा हार्दिक स्वागत गरेका छन्।
निर्वाचनको मुखमा विभिन्न दल परित्याग गरी कांग्रेस प्रवेश गर्नेको संख्या बढ्दै जानुले पार्टीप्रति जनआकर्षण बढेको संकेत गरेको कांग्रेस नेताहरूको भनाइ छ। उनीहरूले लोकतान्त्रिक मूल्य, संविधानको रक्षा र समावेशी विकासका एजेन्डालाई अघि बढाउन कांग्रेस नै उपयुक्त विकल्प भएको बताए।
उक्त अवसरमा सिरहा निर्वाचन क्षेत्र नम्बर २ का नेपाली कांग्रेसका उम्मेदवार रामचन्द्र यादव निरन्तर चुनावी अभियानमा सक्रिय रहेको उल्लेख गर्दै कार्यक्रमहरूमा समर्थकहरूको उल्लेखनीय सहभागिता देखिएको जनाइएको छ।
कांग्रेस नेताहरूले जनताको विश्वास र समर्थनलाई निर्वाचनमा विजयमा रूपान्तरण गर्ने प्रतिबद्धता व्यक्त गर्दै आगामी दिनमा गाउँ–गाउँ केन्द्रित चुनावी अभियानलाई अझ तीव्र बनाउने बताएका छन्।