लहान नगर सामुदायिक विद्यालय स्तरीय क्रिकेट प्रतियोगिता सम्पन्न, पशुपति आदर्श मावि ‘A’ च्याम्पियन

महेश सिंह लहान, सिरहा- पशुपति आदर्श माध्यमिक विद्यालय लहान, मटिअर्वा सिरहाद्वारा आयोजित तथा लहान नगरपालिकाको प्रायोजन र लहान क्रिकेट क्लबको सहकार्यमा सञ्चालित लहान नगर सामुदायिक माध्यमिक विद्यालय स्तरीय क्रिकेट प्रतियोगिता २०८२ सोमबार सम्पन्न भएको छ।
अन्तिम तथा अत्यन्त प्रतिस्पर्धात्मक फाइनल खेलमा श्री पशुपति आदर्श माध्यमिक विद्यालय लहान, मटिअर्वा सिरहा ‘A’ टिमले श्री ल. ल. कु. माध्यमिक विद्यालय रघुनाथपुर, लहान सिरहा ‘A’ टिमलाई पराजित गर्दै उपाधि जितेको हो। रघुनाथपुर मावि ‘A’ टिम उपविजेतामा सीमित भयो।
लीग चरणमा आधारित प्रतियोगिताको सुरुवात २०८२/१०/११ गते भएको थियो भने २०८२/१०/२३ गते समापन भएको हो। प्रतियोगितामा लहान नगरका ८ वटा सामुदायिक माध्यमिक विद्यालयका १० टिम सहभागी भएका थिए। प्रतियोगिताका सम्पूर्ण खेलहरू श्री पशुपति आदर्श माध्यमिक विद्यालय लहानको खेलमैदानमा सम्पन्न भएका थिए।
समापन तथा पुरस्कार वितरण समारोहमा विद्यालय व्यवस्थापन समितिका अध्यक्ष तथा सगरमाथा चौधरी आँखा अस्पताल लहानका अध्यक्ष रविन्द्रलाल चौधरीको अध्यक्षता रहेको थियो। कार्यक्रममा श्री पशुपति आदर्श माध्यमिक विद्यालय लहानका पूर्व अध्यक्ष, जे.एस. मुररका क्याम्पस लहानका पूर्व अध्यक्ष, लहानका पूर्व नगर प्रमुख, जिल्ला विकास समिति सिरहाका पूर्व सभापति, पूर्व सभासद, पूर्व सांसद तथा समाजसेवी लगनलाल चौधरी प्रमुख अतिथिका रूपमा सहभागी हुनु भएको थियो।
कार्यक्रममा विद्यालयका प्रधानाध्यापक डा. महेन्द्र प्रसाद चौधरीले स्वागत मन्तव्यसहित प्रतियोगिताबारे जानकारी गराउनु भएको थियो। कार्यक्रमको सञ्चालन शिक्षिका ममता चौधरी र रीनु चौधरीले संयुक्त रूपमा गर्नुभएको थियो।
सहायक प्रधानाध्यापक शोभित लाल चौधरीको संयोजकत्वमा सम्पन्न प्रतियोगितामा विद्यालयका शिक्षक–शिक्षिका तथा कर्मचारीहरूले व्यवस्थापन र निगरानीमा सक्रिय भूमिका निर्वाह गरेका थिए।
विद्यालय परिवारले प्रतियोगितालाई सफलतापूर्वक सम्पन्न गर्न प्रत्यक्ष तथा अप्रत्यक्ष रूपमा सहयोग पुर्‍याउने सम्पूर्ण सरोकारवाला निकाय, शिक्षक, कर्मचारी, खेलाडी तथा सहयोगीप्रति धन्यवाद व्यक्त गरेको छ।