३० वर्षको जनसेवाको आधारमा मत माग्दै राम चन्द्र यादव कांग्रेसले नै देश परिवर्तन गर्छ : चुनावी सभामा यादवको दाबी

महेश सिंह लहान – नेपाली कांग्रेस परिवर्तनको पार्टी भएको स्थानीय युवा नेता नवीन कुमार यादवले बताएका छन्। कांग्रेस विकास र निकास दुवैको भरोसायोग्य शक्ति भएको उल्लेख गर्दै उनले देश परिवर्तन गर्ने क्षमता कांग्रेससँग मात्रै रहेको दाबी गरे।
सिरहा निर्वाचन क्षेत्र नम्बर २ मा आयोजित नेपाली कांग्रेसको चुनावी सभालाई सम्बोधन गर्दै कांग्रेस सिरहाका सभापति तथा संविधानसभा सदस्यसमेत रहेका यादवले आफू काम गर्ने नेता भएको बताए। फागुन २१ गते हुन गइरहेको निर्वाचनका उम्मेदवारसमेत रहेका यादवले विगत करिब ३० वर्षदेखि निरन्तर जनसेवामा सक्रिय रहँदै आएको उल्लेख गर्दै जनताको मत आवश्यक रहेको बताए।
“म भाषणभन्दा कर्ममा विश्वास गर्छु, मलाई जिताएर पठाउनुस्, विकास गरेर देखाउँछु,” उनले भने।
सभामा कांग्रेसका वरिष्ठ नेता रामचन्द्र यादवले नेपालको इतिहासमा लोकतन्त्र, राष्ट्रियता र संविधान जोगाउन कांग्रेसले निर्णायक भूमिका खेलेको बताए।
कार्यक्रममा पूर्व जिल्ला सभापति तथा सांसद अमय कुमार यादव, पूर्व सांसद नरेश कुमार यादव, मधेस प्रदेश सभा सदस्य जिबछी यादव, कांग्रेस मधेस प्रदेश सदस्य सरोज कुमार यादव, नेता सुमन यादव, वरियारपट्टी गाउँपालिका उपाध्यक्ष ममता कुमारी यादव, नेता शैलेन्द्र यादव, उपेन्द्र यादव, रामपृत यादव, मदन यादवलगायत जिल्लाका वरिष्ठ नेता तथा कार्यकर्ताको उल्लेखनीय उपस्थिति रहेको थियो।
जसपा नेपालको गढ मानिने वरियारपट्टी क्षेत्रमा कांग्रेसको उल्लेखनीय उपस्थितिले पार्टीप्रति जनआकर्षण बढ्दै गएको आयोजकको दाबी छ। चुनाव नजिकिँदै जाँदा यादवको समर्थनमा जनउत्साह थपिँदै गएको छ।
सभामा हजारौँको सहभागिता रहेको र विभिन्न राजनीतिक दल परित्याग गरी दर्जनौँ व्यक्तिले नेपाली कांग्रेस प्रवेश गरेको जनाइएको छ।
कार्यक्रमका प्रमुख अतिथि यादवले चुनाव प्रचार–प्रसारलाई प्रभावकारी बनाउन पार्टी कार्यालयको उद्घाटन गर्दै रिबन काटेका थिए।