लहान-१६ दिने लैङ्गिक हिंसा विरुद्धको अभियान अन्तर्गत लहान नगरपालिका–१५ मा र्‍याली र कोण सभा

महेश सिंह लहान सिरहा – लहान नगरपालिका–१५ मा ‘लैङ्गिक हिंसा विरुद्ध १६ दिने अभियान’ अन्तर्गत विभिन्न सरोकारवालाको संयुक्त सहभागितामा सोमबार जनचेतनामूलक कार्यक्रम सम्पन्न भएको छ। सगरमाथा माध्यमिक विद्यालय, संरक्षण परियोजना, SOS बाल ग्राम नेपाल र सामुदायिक वन उपभोक्ता महासंघ सिरहाको संयुक्त आयोजनामा राजदेवी मन्दिर प्रांगणबाट सुरु भएको र्‍याली महादेव चौक, विराटनगरमा कोण सभासहित सम्पन्न भएको हो।

लकार्यक्रम केयर नेपालको आर्थिक सहयोग, राष्ट्रिय कृषक समूह महासंघ नेपालको समन्वय र लहान नगरपालिकाको सहकार्यमा सम्पन्न गरिएको आयोजकले जानकारी दिएको छ। कार्यक्रममा अधिकारकर्मी, विद्यार्थी, स्थानीय महिला र हिंसा प्रभावित व्यक्तिहरूको उल्लेखनीय उपस्थिति थियो।

महासंघका दिलिप कुमार साह, सोभा कुमारी पासवान, बेदा अधिकारीलगायतको सहभागिता रहेको कार्यक्रमलाई सगरमाथा माविका प्रधानाध्यापक बलराम सिंह, हातीदह पर्यटक क्षेत्रका प्रबन्धक रुद्र नारायण चौधरी, सामुदायिक वन उपभोक्ता महासंघ सिरहाका अध्यक्ष चन्देश्वर साह तथा महिला अधिकारकर्मी रामकुमारी दासले सम्बोधन गरेका थिए।
कार्यक्रममा विद्यालयका विद्यार्थी तथा ग्रामीण महिलाहरूको समेत उत्साहजनक सहभागिता रहेको आयोजक समितिले बतायो।

मधेस प्रदेशमा मात्रै पछिल्लो वर्ष ५५६ वटा लैङ्गिक हिंसासम्बन्धी उजुरी दर्ता भएको तथ्यांक सार्वजनिक कार्यक्रममा प्रस्तुत गरिएको थियो। प्रदेशभरि सबैभन्दा बढी महिला हिंसाका घटना यसै क्षेत्रमा भएको वक्ताहरूले बताए।

सन १९८० दशकदेखि विभिन्न मुलुकमा महिला माथि हुने हिंसा विरुद्ध दिवसहरू मनाइँदै आएपनि १९९९ मा संयुक्त राष्ट्रसंघले आधिकारिक रूपमा अनुमोदन गरेपछि विश्वव्यापी रूपमा अभियान सुरु भएको हो। नेपालमा १९९८ देखि विभिन्न कार्यक्रम गर्दै मनाउन थालिएको यो अभियानलाई सरकारले २०७५ कार्तिक २९ गते मन्त्रिपरिषद्को निर्णयमार्फत प्रत्येक वर्ष नोभेम्बर २५ देखि डिसेम्बर १० सम्म औपचारिक रूपमा मनाइने व्यवस्था गरेको छ।

कार्यक्रमका प्रमुख अतिथि तेज नारायण चौधरीले लैङ्गिक हिंसा घरभित्रै लुकेर रहने समस्याको पहिचान गर्न नसकिएको बताए। “हिंसा आफैँलाई थाहै नभएर आफ्नै घरभित्रबाट सुरु हुन्छ। त्यसलाई चिर्न र समाजबाट उन्मूलन गर्न सामूहिक प्रयास आवश्यक छ,” उनले भने।

अभियानले लैङ्गिक समानता, न्यायमा पहुँच, समावेशी सहभागिता र सुरक्षित समाज निर्माणको सन्देश दिन सफल भएको आयोजकहरूले बताए।