विद्यालय उपस्थिति वृद्धि र शिक्षा प्रतिको जिम्मेवारीबारे अभिभावकहरू प्रतिबद्ध

महेश सिंह सिरहा-शनिबार लहान नगरपालिका–१२, जटियाही सदाय टोलमा अभिभावक सचेतना कार्यक्रम सम्पन्न भएको छ। विद्यालयमा विद्यार्थीहरूको न्यून उपस्थिति समस्या समाधानका उद्देश्यले आयोजित कार्यक्रममा अभिभावकहरूले अबदेखि आफ्ना बालबालिकालाई नियमित विद्यालय पठाउने प्रतिबद्धता व्यक्त गरेका छन्।

कार्यक्रममा वडा नं.१२ का वडाध्यक्ष श्री बद्री नारायण चौधरी, वडा सदस्य सुप्रेखा सदाय, विद्यालयका प्रधानाध्यापक मनोज यादव, शिक्षकद्वय सुकुमाया रमौली र निलम चौधरी, सहायक लेखापाल धर्मेन्द्र चौधरी, र SOS बालग्राम लहान शाखाका कर्मचारी चलितर सदाय लगायतको उपस्थिति रहेको थियो।

कार्यक्रम अभिभावक सचेतना कार्यक्रम अन्तर्गत विद्यालय उपस्थिति सुधारका लागि गरिएको अभियानको हिस्सा हो। कार्यक्रममा विद्यार्थी र अभिभावकबीच छलफल गर्दै बालबालिकाको शिक्षामा परिवारको भूमिका, विद्यालयको जिम्मेवारी र समुदायको सहकार्यका विषयमा विस्तृत चर्चा गरिएको थियो।

सचेतना कार्यक्रम पश्चात् SOS बालग्राम लहान शाखाद्वारा ४२ जना दलित बालबालिकालाई विद्यालय पोसाक, जुत्ता र मोजा वितरण गरिएको विद्यालय प्रशासनले जनाएको छ।

प्रधानाध्यापक मनोज यादवले भने, “विद्यार्थीको हाजिरी सुधार अभिभावकको सहभागितासँग प्रत्यक्ष सम्बन्धित छ। आजको कार्यक्रमले समुदायमा शिक्षा प्रतिको चेतना अझ प्रष्ट बनाएको छ।” त्यस्तै, वडाध्यक्ष बद्री नारायण चौधरीले विद्यालय र अभिभावकबीचको सहकार्यले शैक्षिक सुधारमा दीर्घकालीन प्रभाव पार्ने विश्वास व्यक्त गरे।

स्थानीय अभिभावकहरूले पनि विद्यालयका नियम पालना गर्दै आफ्ना बालबालिकालाई नियमित पढाइमा सहभागी गराउने संकल्प लिएका छन्। यो सचेतना अभियानलाई समुदायले शिक्षा सुदृढीकरणतर्फको सकारात्मक पहलका रूपमा स्वागत गरेको छ।