महेश सिंह लहान सिरहा- लायन्स क्लब अफ लहान फुलबारीले आफ्नो तेस्रो बोर्ड बैठक तथा छठ पर्वको शुभकामना आदान–प्रदान कार्यक्रम सम्पन्न गरेको छ।
कार्यक्रम क्लबका अध्यक्ष शंकर प्रसाद गुप्ताको अध्यक्षतामा सम्पन्न भएको हो। कार्यक्रममा क्लबका पदाधिकारी, सदस्य, सामाजिक अभियन्ता तथा विभिन्न क्षेत्रका व्यक्तित्वहरूको उल्लेखनीय उपस्थिति रहेको थियो।
सो अवसरमा क्लबका तर्फबाट प्रेस मञ्च नेपाल, सिरहाका अध्यक्ष महेश सिंह र राष्ट्रिय दैनिक गोरखापत्रका सिरहा समाचारदाता जिवछ यादव उदासीलाई Token of Memento प्रदान गरी सम्मान गरिएको थियो। सम्मानित व्यक्तिहरूले संस्थाको सामाजिक कार्यप्रति आभार व्यक्त गर्दै यस्ता कार्यक्रमहरूले पत्रकार र समाजसेवीबीचको सम्बन्ध अझ प्रगाढ बनाउने विश्वास व्यक्त गरे।
अध्यक्ष गुप्ताले लायन्स क्लब अफ लहान फुलबारी पूर्ण रूपमा गैरनाफामुखी र समाजसेवामा समर्पित संस्था रहेको बताउँदै, विपन्न र दिनदुःखी समुदायका सेवामा निरन्तर क्रियाशील रहने प्रतिबद्धता व्यक्त गरे।
कार्यक्रमको अन्त्यमा उपस्थित सबैले छठ पर्वको शुभकामना आदान–प्रदान गर्दै सामाजिक सद्भाव, धार्मिक एकता र सहकार्यका भावनालाई अझ सुदृढ बनाउँदै अघि बढ्ने संकल्प व्यक्त गरे।
Discussion about this post