सिरहामा कृषि महासंघले पोषण सचेतना तथा विश्व स्वास्थ्य दिवस मनायो

महेश सिंह लहान सिरहा – जिल्लाका विभिन्न स्थानीय तहहरूमा पोषण सुधार तथा स्वास्थ्य सचेतना अभिवृद्धि गर्ने उद्देश्यले कार्यक्रमहरू सञ्चालन गरिएका छन्। पोषण परियोजनाका अनुगमन अधिकृत आंचल खड्काको पहलमा आयोजित उक्त कार्यक्रममा गर्भवती महिलाहरूलाई बच्चाको स्याहार, सन्तुलित आहारको महत्व तथा कुपोषणबाट बच्ने उपायबारे विस्तृत जानकारी प्रदान गरिएको थियो।
कार्यक्रममा कृषक समूहमा आवद्ध महिलाहरूलाई लक्षित गर्दै कुपोषण हुन नदिन अपनाउनुपर्ने व्यवहार, पोषणयुक्त खानेकुराको प्रयोग तथा कुपोषित बालबालिकाको व्यवस्थापन कसरी गर्ने भन्ने विषयमा सचेतना अभिवृद्धि गरिएको थियो। कार्यक्रमको सहजीकरण भगवानपुर गाउँपालिकाको बर्थिङ्ग सेन्टरका इन्चार्ज डा. हिरालाल कामतीले गर्नुभएको थियो।
त्यसैगरी, पोषण परियोजनाअन्तर्गत कृषि बजारीकरण सहजकर्ता देब नारायण चौधरी तथा स्वास्थ्य तथा सरसफाइ सहजकर्ता सबिना मण्डलले कार्यक्रमको उद्देश्य र उपलब्धिबारे जानकारी गराउनुभएको थियो।
यसैबीच, सिरहाको लक्ष्मीपुर पतारी गाउँपालिकामा पनि विश्व स्वास्थ्य दिवसको अवसरमा विशेष कार्यक्रम आयोजना गरिएको थियो। कार्यक्रममा स्वास्थ्य शाखा प्रमुख अनिल साहले स्वास्थ्यसम्बन्धी विभिन्न विषयमा सहजीकरण गर्नुभएको थियो।
उक्त कार्यक्रम लक्ष्मीपुर पतारी गाउँपालिकाका अध्यक्ष चतुरानन्द ठाकुरको अध्यक्षतामा सञ्चालन भएको थियो भने भगवानपुर गाउँपालिकामा महासंघका पालिका अध्यक्ष रामचन्द्र यादवको अध्यक्षतामा कार्यक्रम सम्पन्न भएको थियो।
कार्यक्रममा महासंघका मधेस प्रदेश सचिव यामुन प्रसाद यादवको समेत उपस्थिति रहेको थियो। सहभागीहरूले यस्ता कार्यक्रमहरूले समुदायमा स्वास्थ्य र पोषणसम्बन्धी जनचेतना वृद्धि गर्न महत्वपूर्ण भूमिका खेलेको बताएका छन्। स्थानीय तहको सक्रियता र सरोकारवालाको सहकार्यमा सञ्चालन भएका यस्ता कार्यक्रमहरूले कुपोषण न्यूनीकरण, मातृ तथा शिशु स्वास्थ्य सुधार र स्वस्थ समाज निर्माणमा टेवा पुर्‍याउने अपेक्षा गरिएको छ।