धनगढीमाईमा पोषण कार्यक्रमको समीक्षा, प्रभावकारी कार्यान्वयनमा जोड

महेश सिंह सिरहा, धनगढीमाई — सिरहाको धनगढीमाई नगरपालिकामा पालिकास्तरीय पोषण तथा खाद्य सुरक्षा निर्देशकीय समितिको समीक्षा बैठक सम्पन्न भएको छ। “सुगठित, समृद्ध, सम्मानित किसान : सबल महासंघ” भन्ने मूल नाराका साथ आयोजित कार्यक्रमले स्थानीय तहमा पोषण सुधार र खाद्य सुरक्षालाई थप प्रभावकारी बनाउने लक्ष्य लिएको छ।
नगर प्रमुख शिव शंकर महतो को अध्यक्षतामा सम्पन्न बैठकमा जनप्रतिनिधि, विभिन्न शाखाका प्रमुख, सरोकारवाला निकाय तथा साझेदार संस्थाका प्रतिनिधिहरूको सहभागिता रहेको थियो। बैठकमा हालसम्म सञ्चालन भएका पोषण तथा खाद्य सुरक्षासम्बन्धी कार्यक्रमहरूको समीक्षा गर्दै आगामी दिनमा तिनको प्रभावकारिता बढाउने उपायबारे छलफल गरिएको थियो।
उप–प्रमुख संगिता चौधरी ले स्थानीय तहमा पोषण अवस्था सुधार गर्न समुदायस्तरमै सचेतना अभिवृद्धि आवश्यक रहेको बताइन्। उनले कृषिको आधुनिकीकरण र उत्पादन वृद्धि बिना खाद्य सुरक्षामा दीर्घकालीन सुधार सम्भव नहुने धारणा राखिन्। सहभागीहरूले खाद्य सुरक्षाको सुनिश्चितताका लागि बहुपक्षीय सहकार्य अपरिहार्य रहेकोमा जोड दिएका थिए।
“कोई बच्चा कुपोषण नहोस्, सबै नागरिक निरोगी रहून्” भन्ने उद्देश्यसहित कार्यक्रम सञ्चालन गरिएको नगर प्रमुख महतोले बताए। उनका अनुसार यस्ता कार्यक्रमले स्थानीय स्तरमा पोषण तथा खाद्य सुरक्षाका प्रयासलाई सुदृढ बनाउँदै दिगो विकास लक्ष्य प्राप्तिमा टेवा पुर्‍याउनेछ।
उक्त कार्यक्रम “Nurture Every Future: Poshan Nepal” अभियान अन्तर्गत CARE Nepal र iDE Nepal लगायतका संस्थाको सहकार्यमा आयोजना गरिएको थियो।
कार्यक्रमको अनुगमन यामुन प्रसाद यादव ले गरेका थिए भने सहजीकरण धिरज साह ले गरेका थिए। कृषि तथा बजारीकरण सहजकर्ता रिना कुमारी महतो का अनुसार कार्यक्रम व्यवस्थापन सुरुचि चौधरी ले सम्हालेकी थिइन्।