बालविवाह अन्त्य र स्थानीय सहकार्यमा जोड दिँदै गोलबजारमा मुक्ति नेपालको समिक्षा बैठक सम्पन्न

महेश सिंह लहान सिरहा – बालविवाह न्यूनीकरण र समुदायस्तरमा सहकार्य सुदृढ गर्ने लक्ष्यसहित मुक्ति नेपालले गोलबजार नगरपालिकामा नगरस्तरीय परिचयात्मक तथा समिक्षा बैठक आयोजना गरेको छ। आइतबार बिहानदेखि सुरु भएको उक्त कार्यक्रममा स्थानीय सरकार, युवा प्रतिनिधि, सामुदायिक समूह तथा सरोकारवाला निकायहरूको उल्लेखनीय सहभागिता देखिएको थियो।
कार्यक्रममा विशेषगरी “बन्धन तोड्दै : राम्रो भविष्यको लागि बाल विवाह अन्त्य” अभियान र “शान्तिका लागि स्थानीय क्षमता कार्यक्रम (LCP)” सम्बन्धी प्रस्तुतिहरूले सहभागीहरूको ध्यान आकर्षित गरेको थियो। प्रस्तुतिहरूमार्फत समुदायमा देखिएका बालविवाहका चुनौती, किशोरी सशक्तिकरणका प्रयास तथा दीर्घकालीन समाधानका उपायहरूबारे स्पष्ट जानकारी गराइएको थियो।
खुला छलफल सत्रमा सहभागीहरूले आफ्ना अनुभव र सुझाव राख्दै स्थानीय स्तरमा जनचेतना अभिवृद्धि, किशोरीहरूको क्षमता विकास र बहुपक्षीय सहकार्य आवश्यक रहेको औंल्याएका थिए। उनीहरूले समुदायमै आधारित पहललाई अझ प्रभावकारी बनाउन स्थानीय सरकार र संघसंस्थाबीच समन्वय अपरिहार्य रहेको धारणा व्यक्त गरे।
कार्यक्रमका प्रमुख अतिथि नगर प्रमुख श्याम कुमार श्रेष्ठले यस्ता कार्यक्रमले समाजमा सकारात्मक परिवर्तन ल्याउन महत्वपूर्ण भूमिका खेल्ने विश्वास व्यक्त गर्दै आगामी दिनमा सहकार्यलाई थप मजबुत बनाउने प्रतिबद्धता जनाए।
अध्यक्ष देवकुमारी महराले समापन मन्तव्य दिँदै कार्यक्रमबाट प्राप्त सुझाव र अनुभवलाई आगामी योजना निर्माणमा समेटिने बताइन्। उनले बालविवाह अन्त्य र सामाजिक रूपान्तरणका लागि सबै पक्षको सहकार्य आवश्यक रहेकोमा जोड दिँदै सहभागीहरूलाई धन्यवाद ज्ञापन गरिन्।